नोवेल मेडिकल कलेजमा अतिरिक्त शुल्क नबुझाउने विद्यार्थीलाई प्रवेश रोक

विराटनगर‒ नोवेल मेडिकल कलेज विराटनगरले अतिरिक्त शुल्क नबुझाएका एमवीवीएसका विद्यार्थीलाई प्रवेशमा रोक लगाएको छ। मेडिकल कलेजले सुरक्षा गार्ड र अन्य युवाहरुको प्रयोग गरी विद्यार्थीलाई कलेज प्रवेशमा रोक लगाएको हो।

जिल्ला प्रशासन कार्यालय मोरङले पुस ११ गतेदेखि पठनपाठन गर्न निर्देशन दिएपछि पठनपाठन शुरु गरेको मेडिकल कलेजले २ दिन पढाएर शुल्क नबुझाएको भन्दै बुधवारदेखि पठनपाठन रोकेको थियो। अतिरिक्त शुल्क नबुझाउनेको पठनपाठन रोकिएको र सबै शुल्क बुझाउनेलाई मात्र कलेजले पढाएको विद्यार्थीले बताएका छन् ।

नोवेल मेडिकल कलेजमा भर्ना भएका ९६ विद्यार्थीमध्ये ९ जना भारतीय, १० जना छात्रवृत्तिका र ५ जना अतिरिक्त शुल्क बुझाएका विद्यार्थीलाई भने  कलेजको माथिल्लो भवनका छुट्टै लगेर पढाउने गरिएको छ। पुस ५ गतेदेखि अतिरिक्त शुल्क नबुझाउने भनेर विद्यार्थी तथा अभिभावक आन्दोलित बनेका छन्।

प्रिन्सिपल रामहरि घिमिरेले अतिरिक्त शुल्क नबुझाउनेलाई पढाउन नसक्ने जानकारी गराएर पठनपाठनमा रोक लगाएको विद्यार्थीको भनाइ छ । विद्यार्थीले होस्टल, बिजुली, इन्टरनेट, खानाको चर्को शुल्क तोकिएको बताए । कलेजले होस्टल अनिवार्य गरेको छ ।
कलेजले बुधबार कक्षाकोठाबाट निष्कासन गरेर पठनपाठनबाटै वञ्चित गरेको विद्यार्थीले बताएका छन्।

आयोगले एमबीबीएस अध्ययनका लागि ४४ लाख ३६ हजार २५ रुपैयाँ शुल्क निर्धारण गरेको छ । त्यसमध्ये प्रथम वर्षको १४ लाख ८५ हजार अभिभावकले बुझाइसकेका छन् । तर, कलेज सञ्चालक सुनील शर्मा अतिरिक्त २० लाख बुझाउने सर्तनामामा हस्ताक्षर गराएपछि मात्रै पठनपाठन सुरु गर्ने अडानमा छन् ।

चिकित्सा शिक्षा आयोगले एमबीबीएस अध्ययनका लागि ४४ लाख ३६ हजार २५ रुपैयाँ शुल्क निर्धारण गरेको छ । प्रथम वर्षको १४ लाख ८५ हजार अभिभावकले बुझाइसकेका छन । तर, कलेज सञ्चालक सुनील शर्मा अतिरिक्त २० लाख बुझाउने सर्तनामामा हस्ताक्षर गराएपछि मात्रै पठनपाठन सुरु गर्ने अडानमा रहेको एक विद्यार्थीले बताए ।

चिकित्सा शिक्षा आयोगले मंसिर २२ गते सूचना निकाली आयोगले तोकेभन्दा बढी शुल्क नतिर्न विद्यार्थी, अभिभावक तथा सरोकारवाहरुलाई आग्रह गरेको छ । उसले आयोग निर्धारण गरेको बाहेकको अन्य शिर्षकमा शुल्क नतिर्न भनेको छ ।