नेरुडेले २१ प्रतिशत बोनस शेयर दिने

नेरुडे लघुवित्त वित्तीय संस्थाले २१ प्रतिशत बोनस शेयर दिने भएको छ।

नेपाल समय | आइतबार, पुस ११, २०७८

नेपाल समय

आइतबार, पुस ११, २०७८

विराटनगर‒ नेरुडे लघुवित्त वित्तीय संस्थाले २१ प्रतिशत बोनस शेयर दिने भएको छ। विराटनगरमा शनिबार सम्पन्न १५औं वार्षिक साधारणसभाले २१ दशमलव ४८७ बोनस शेयर र १ दशमलव १३ प्रतिशत नगद लाभांश वितरण गर्ने निर्णय पारित गरेको छ।

सञ्चालक समितिका अध्यक्ष डा. भेषप्रसाद धमलाले आर्थिक वर्ष २०७७/०७८ मा १ लाख ४८ हजार ३२ घर परिवारमा लघुवित्त सेवा पुर्‍याई ९० हजार १७८ ऋणी सदस्यलाई ७ अरब ९० करोड ऋण लगानी बताए। उनले २ अरब ६१ करोड बचत संकलन गरी सम्पूर्ण कारोबार समावेश पछिको खुद मुनाफा १९ करोड १० लाख ६४ हजार ८ सय ४६ रुपैयाँ ५७ पैसा आर्जन गरेको साधारणसभालाई जानकारी गराएका थिए।

वित्तीय संस्थाका प्रमुख कार्यकारी अधिकृत भोजराज बस्यालले संस्थाको चुक्ता पुँजी ६० करोड पुगेको जानकारी दिए। साधारणसभाबाट सर्वसाधारण शेयरधनीहरू मध्येबाट सुधिरकुमार श्रेष्ठ र बलराम बराललाई वित्तीय संस्थाको सञ्चालकमा निर्विरोध चयन गरेको छ। नेरुडे लघुवित्त वित्तीय संस्थाले ३१ जिल्लाका १०७ वटा शाखा कार्यालय मार्फत १ लाख ५४ हजार परिवारलाई लघुवित्त सेवा दिइरहेको प्रमुख कार्यकारी अधिकृत बस्यालले बताए।

साधारणसभाको अवसरमा उत्कृष्ट लक्ष्य प्रगति गर्ने शाखाहरू तेतरिया, चिमडि, झुम्का र बोदेबर्साइनलाई २५‒२५ हजार नगद सहित सम्मानित गरिएको छ।

प्रकाशित: Dec 26, 2021| 07:26 आइतबार, पुस ११, २०७८