माओवादी प्रदेश १ अध्यक्षमा तीन जनाको दाबी

विराटनगर‒ नेकपा माओवादी केन्द्र प्रदेश १ मा तीन जनाले दाबी गरेका छन्। शनिबार मोरङको विराटचोकमा हुने प्रथम अधिवेशन सुरु हुँदैछ। अधिवेशनको माओवादी केन्द्र अध्यक्ष पुष्पकमल दाहाल (प्रचण्ड) ले भर्चुअल रूपमा उद्घाटन गर्ने छन्। 

प्रदेश अध्यक्षमा वर्तमान अध्यक्ष सुरेशकुमार राई (हिमाल), प्रदेश १ आर्थिक मामिला तथा योजनामन्त्री इन्द्रबहादुर आङ्वो (मौसम) र प्रदेश सचिव हेमराज भण्डारी अध्यक्षका आकांक्षी छन्। प्रदेश अध्यक्षमा पार्टी अध्यक्ष पुष्पकमल दाहालले हस्तक्षेप नगरे निर्वाचन हुने नेताहरूले बताएका छन्। 

वर्तमान अध्यक्ष राईलाई नै निरन्तरता दिने सोचमा अध्यक्ष दाहाल रहेको श्रोतको भनाई छ। उदयपुरका प्रतिनिधिसभा सदस्य राईको जनाधार समेत राम्रो रहेकाले उनलाई अध्यक्ष बनाउने प्रचण्डको तयारी रहेको माओवादीकै नेताहरूको भनाई छ। प्रदेश अध्यक्ष राईले सहमतिका लागि प्रयास भइरहेको बताए।  

युवाहरूमा लोकप्रिय मानिएका नेता आङ्वो नेकपा माओवादी केन्द्र प्रदेश १ संसदीय दलको नेता पनि हुन्। वर्तमान प्रदेश सचिव भण्डारी पनि अध्यक्षको उम्मेदवारको लाइनमा छन्। आङ्वो अध्यक्षका लागि नेताहरूसँग लबिङ गरिरहेको श्रोतको भनाई छ। 

धनकुटाका भण्डारी संविधान सभा सदस्य हुन्। माओवादीबाट जितेका जनप्रतिनिधिहरू रोक्न नसकेको आरोप खेप्नुपरेका भण्डारीसँग धनकुटामा पार्टी कमजोर भएपछि पार्टी अध्यक्ष प्रचण्ड समेत रुष्ट बनेको बताइएको छ। 

प्रदेश अधिवेशनले अध्यक्ष, तीन उपाध्यक्ष, सचिव, तीन सहसचिव र कोषाध्यक्ष सहित २६९ सदस्यीय प्रदेश कमिटी निर्वाचित गर्ने छ।