नेतृत्व चयनको विवाद बल्झिँदा प्रदेश १ को कांग्रेस अधिवेशन स्थगित

विराटनगर‒ नेपाली कांग्रेसको १४ औं महाधिवेशन अन्तर्गत प्रदेश १ को अधिवेशन  बिहीबार सुरु हुन सकेन।

नेतृत्व चयनका लागि नेताहरुबीच सहमति जुट्न नसकेपछि दिउँसो २ बजे सुरु हुने भनिएको अधिवेशन सुरु हुनै नसकी शुक्रबार बिहानसम्मका लागि स्थगित गरिएको प्रदेश १ अधिवेशन आयोजक समितिका संयोजक केन्द्रीय सदस्य कृष्ण सिटौलाले जानकारी दिए। 

उनका अनुसार शुक्रबार बिहान ८ बजेदेखि अधिवेशन सुरु हुने भएको छ। मञ्‍चमा अतिथि तथा प्रतिनिधिहरु सहभागी भएपनि विविध कारणले अधिवेशन स्थगित गरिएको संयोजक सिटौलाले बताएका छन्। नेतृत्वका विषयमा सहमति जुट्न नसकेपछि अधिवेशन सुरु हुन नसकेको कांग्रेसकै एक नेताले जानकारी दिए।

यसैबीच प्रदेश सभापतिमा दुईजना बीच प्रतिष्पर्धा हुने भएको छ। कांग्रेसमा सभापति शेरबहादुर देउवा र तेस्रो समूहका नेता कृष्णप्रसाद सिटौला समूहबाट झापाका पूर्व सभापति उद्धव थापा र पौडेल‒कोइराला समूहबाट केन्द्रीय सदस्य गुरुराज घिमिरेबीच प्रतिष्पर्धा हुने भएको हो। 

प्रदेश सभापतिका आकांक्षी कांग्रेस प्रदेश १ संसदीय दलका नेता राजीव कोइराला प्रतिष्पर्धाबाट बाहिरिएका छन्।