कांग्रेस कर्णालीको अधिवेशन पौडेल समूहद्वारा बहिष्कार, देउवा समूह भन्छ– डोलीमा राखेर ल्याउन सकिएन

सुर्खेत - नेपाली कांग्रेसको प्रदेश अधिवेशन कर्णालीमा पनि बिहीबारदेखि सुरु भएको छ। प्रदेश राजधानी सुर्खेतको वीरेन्द्रनगरस्थित रंगशाला मैदानमा सुरु भएको अधिवेशनको औपचारिक उद्घाटन गरिएको छ। 

संस्थापन इतर (रामचन्द्र पौडेल) समूहलाई बाइपास गरेर अधिवेशन उद्घाटन गरिएको छ। संस्थापनपक्षीय कांग्रेस महामन्त्री पूर्णबहादुर खड्काले प्रदेश अधिवेशनको औपचारिक उद्घाटन गरेका हुन्।

आफूहरुलाई जानकारी नै नदिएको भन्दै उद्घाटन कार्यक्रममा पौडेल समूहका कुनै पनि नेताहरु सहभागी भएनन्। ‘उद्घाटन कार्यक्रममा पत्र पनि आएन, कुनै माध्यमबाट खबर पनि भएन,’ पौडेल पक्षीय कांग्रेसका केन्द्रीय सदस्य हृदयराम थानीले भने, ‘मैले त उहाँ (संस्थापन) समूहको भेला होला भन्‍ने ठानेको थिएँ, उद्घाटन पो रहेछ।’ आफूहरुलाई कुनै जानकारी नदिएर कार्यक्रम उद्घाटन गरेको उनको आरोप छ।संस्थापन इतर समूहकै पूर्व पार्टी सभापति कमलराज रेग्मी पनि उद्घाटन कार्यक्रममा सहभागी भएनन्।\

‘आज प्रदेश भेला हुन्छ भन्ने त थाहा थियो तर कहाँ र कति बेला उद्घाटन हो भन्ने एकीन थिएन’ रेग्मीले भने, ‘म साथीहरुसँग छलफलमै थिए, उत्ता उद्घाटन नै भैसकेछ।’ संस्थापन समूहले आफूहरुलाई बाइपास गरेर अधिवेशन उद्घाटन गरेको उनको आरोप छ। 

यता संस्थापन समूहले भने बाइपास नभई पौडेल समूहले कार्यक्रम नै बहिस्कार गरेको दाबी गरेको छ। ‘उद्घाटन कार्यक्रमलाई खबर गर्ने भन्दा पनि नेताहरुले व्यवस्थापन गर्ने विषय हो,’ संस्थापन समूहका एक नेताले भने, ‘उहाँहरु (पौडेल पक्षीय नेताहरु)लाई लिन डोली लिएर आउन जान सकिएन, उहाँहरु नआउनु भएको मात्रै हो।’

पौडेल पक्षीय नेताहरुले जानाजान उद्घाटन कार्यक्रममा सहभागी नभएको संस्थापन समूहको दाबी छ। कर्णालीमा प्रदेश अधिवेशनको व्यवस्थापन र सम्पन्न गर्ने सम्पूर्ण अधिकारी काँग्रेसका केन्द्रीय सदस्य तथा कर्णालीका मुख्यमन्त्री जीवनबहादुर शाहीलाई दिइएको छ। शाही संस्थापन पक्षिय नेता हुन्।