झापामा सिटौला पक्षको प्यानल नै विजयी, मोरङमा त्रिपक्षीय भिडन्त

विराटनगर- नेपाली कांग्रेस झापाको सभापतिमा देउमान थेवे निर्वाचित भएका छन्। थेवेले निकटतम प्रतिस्पर्धी रामबहादुर कट्टेललाई पराजित गरे। संस्थापन विश्वप्रकाश शर्मा पक्षका कट्टेलले सुरुवातदेखि नै अग्रता लिए पनि अन्तिम समयमा पराजित भए। सिटौलाको निर्वाचन क्षेत्र नम्बर ३ को मतले थेबे विजयी भएका हुन्।

उपसभापतिमा केशव पाण्डे र शेरबहादुर भट्टराई, सचिवमा नवीन बिमली र कृष्ण हुँमागाइ, सहसचिवमा कमल भण्डारी र कालेन्द्र राजवंशी विजयी भएका हुन्।  १३ औँ अधिवेशनमा सिटौला प्यानलबाट जिल्ला उपसभापति भएका कट्टेललाई शर्माले सभापतिमा उम्मेदवार बनाएका हुन्। 

तीन हजार ३६९ जना क्षेत्रीय प्रतिनिधिले मतदान गरेकोमा थेबेको पक्षमा १ हजार ७६५ र कट्टेलले १ हजार ५१५ मत पाएका थिए। यसैबीच मोरङमा नयाँ नेतृत्व चयनका लागि सोमबार मतदान भएको छ। 

मोरङ सभापतिमा डिगबहादुर लिम्बु, दिलीप गच्छदार र यदुकुमार विष्टबीच प्रतिष्पर्धा भएको छ।  लिम्बु र विष्ट संस्थापन इतर समूहका हुन् भने गच्छदार संस्थापन पक्षका हुन्। 

उपसभापतिमा नागेश कोइराला, भक्ति माझी, गोपालबहादुर थापा, राजु मास्के र सुवोधकुमार सिंह, सचिवमा अर्जुन निरौला, मनोज बस्नेत, मोदराज घिमिरे, रविन राई, ललितबहादुर श्रेष्ठ, शिवप्रसाद ढकाल र ज्ञानेन्द्र ढकाल, सहसचिवमा संजयकुमार मण्डल,भुवनेश्वर मण्डल अशोक रिजाल, विशाल गौतम, सुभाष भण्डारी र थिरप्रसाद फुँयाल प्रतिष्पर्धामा छन्। 

निर्वाचन समितिका अनुसार मोरङमा ७ जना पदाधिकारी र ७८ जना सदस्यको लागि निर्वाचन भएको हो। जसमा ४७ जना पालिकाबाट र ३१ जना खुला तथा  समावेशी कोटाबाट निर्वाचित हुँदैछन्। मोरङमा कुल ३ हजार ५ सय ८५ जना मतदाता छन्।