समारोहमा चुरोट तान्दै पारसले भने, 'अब केही गर्नुपर्छ '

भैरहवा- पूर्वराजा तथा बुवा ज्ञानेन्द्र शाहको जन्मोत्सव मनाउन नेपालगञ्ज हिँडेका पूर्वयुवराज पारस बुधबार भैरहवास्थित सिटीम्याक्स होटेलमा सहयोगीहरूसँग एक सार्वजनिक कार्यक्रममा सार्वजनिक भए । 

नेपालगञ्ज जाने क्रममा उनी मंगलबार राति भैरहवा आइपुगेका हुन् । शिवसेना नेपाल र राजतन्त्र समर्थकहरूले उनीसँगको भेटघाट कार्यक्रम राखेका थिए । राजसंस्था सक्रिय हुनुपर्यो, राजनीतिमा लाग्नु पर्यो भन्दै अनुरोध गरेका आफ्ना शुभेच्छुकहरूलाई पूर्वयुवराजले भने, 'अब ताली पिटेर मात्रै राजसंस्था फर्किन्न, एकजुट भएर लाग्नु पर्यो ।'

करिब आधा घण्टा पत्रकार र शुभेच्छुकहरूसँग बिताएका शाहले त्यसबाहेक अरू केही बोलेनन् । कालो रेबन चश्मा, लामो चुल्ठो बाँधिएको कपालमाथि ढाका टोपी, घाँटीमा सेतो माला र कलेजी रंगको पोशाकमा देखिएका थिए उनी । सार्वजनिक कार्यक्रममा पनि उनको चुरोटको लत प्रकट भयो, आधा घण्टाबीचमै तीन खिल्ली तानेर भ्याए । 

उनीसँगै पहेंलो बस्त्रमा देखिएका महाराज योगी व्यग्र वेगनाथले सबै मिलेर देशमा राजसंस्था फर्काउनुपर्ने बताए । नेपाल प्रहरीका पूर्वमहानिरीक्षक हेमबहादुर सिंहका छोरा प्रभञ्जन सिंह पछिल्लो समय सक्रिय राजसंस्थाको वकालत गर्दै संन्यासी पोशाकमा पूर्वयुवराजसँगै हिँडिरहेका छन् ।



कार्यक्रममा राजावादीहरूले राजसंस्थाको शक्ति क्षय हुनुको कारण विदेशी तत्व नभई राजसंस्थाको आडमा गलत गर्नेहरूको भीडले भएको बताएका थिए । पूर्वयुवराजलाई सम्बोधन गर्दै राजसंस्थाका पूर्वसमर्थक मिलन बस्नेतले भने, 'हामी अहिले पनि राजसंस्थाको आवश्यकता ठानिरहेका छौं तर राजसंस्थासँग जोडिएका व्यक्तिहरूले आफ्नो बानीबेहोरा सच्चाउनु जरुरी छ ।'

राम्रा र सज्जनहरूको सल्लाहमा राजसंस्था चल्दा मात्र त्यसको गरिमा बढ्ने उनले बताए । मुसुमुसु हाँसेर पूर्वयुवराजले उनको अभिव्यक्तिप्रति कुनै प्रतिक्रिया जनाएनन् । 

शिवसेना नेपालका केन्द्रीय अध्यक्ष अनिल बस्नेतले राजसंस्थाको आवश्यकता प्रस्ट्याउँदै सबै मिलेर राजसंस्था फर्काउनुपर्ने बताए । कार्यक्रममा पूर्वमन्त्री प्रकाश चित्रकार, शिवसेना नेपाल रूपन्देहीका अध्यक्ष शिव क्षत्रीलगायतको सहभागिता थियो ।