रोल्पामा जिप दुर्घटना हुँदा ४ जनाको मृत्यु

बुटवल- रोल्पामा जिप दुर्घटना हुँदा ४ जनाको मृत्यु भएको छ। आइतबार भएको दुर्घटनामा परी मृत्यु हुनेमा रोल्पा जिल्ला माडी गाउँपालिका–६ कोर्चाबाङ मिसिडाँडाका ५१ वर्षीय टेकबहादुर पुनमगर, कोर्चाबाङकै ४७ वर्षीय चालक रुद्रबहादुर घर्तीमगर, कोर्चाबाङ रीचा निवासी ४७ वर्षीया चौसरा विश्वकर्मा र कोर्चाबाङकै १८ वर्षीया लिला पुनमगर रहेका छन्।

रोल्पाको माडी गाउँपालिका–६ हान्निङबाट घर्तीगाउँतर्फ जाँदै गरेको रा १ ज ३८२ नम्बरको यात्रुबाहक जीप दुर्घटना हुंदा २ पुरुष र २ महिलाको मृत्यु भएको रोल्पा प्रहरीले जनाएको छ। 

दुर्घटनामा विना घर्तीमगर र पञ्चना विश्वकर्मा गम्भीर घाइते भएका रोल्पा प्रहरी प्रमुख नरेशराज सुवेदीले बताए। 

लुम्बिनीका मुख्यमन्त्री कुलप्रसाद केसीले गृहजिल्लामा भएको दुर्घटनाप्रति दुःख व्यक्त गरेका छन्। मुख्यमन्त्रीको निजी सचिवालयले आइतबार प्रेस विज्ञप्ति जारी गर्दै मृतकप्रति श्रद्धाञ्जलि र घाइतेको शीघ्र स्वास्थ्यलाभको कामना गरेको छ।