कांग्रेस संसदीय दलको बैठक : सरकारलाई प्रहार गर्ने पाँच एजेन्डा यस्ता छन्

काठमडौं- प्रमुख प्रतिपक्षी दल नेपाली कांग्रेसको संसदीय दलको बैठक सिंहदरबारमा बसिरहेको छ । बिहान साढे १० बजेबाट सुरु भएको बैठक कम्युनिस्ट सरकारलाई प्रहार गर्ने पाँच एजेन्डामाथि  केन्द्रित छ।  

बैठकमा अनसनरत गंगामायाको जीवन रक्षा, डा. गेविन्द केसीको माग सम्बोधन, मूल्यवृद्धि नियन्त्रणका विषयमा सरकारलाई कसरी दवाव दिने भन्ने बारे छलफल भइरहेको सांसद प्रकाश रसाइलीले जानकारी दिए । निषेधाज्ञा जारी गरेर सरकारले नागरिक अधिकार खोस्‍न खोजेको विषय पनि बैठकमा महत्वका साथ उठेको छ। 

न्यायका लागि असनमा बस्ने नागरिकको माग सम्बोधन गरेर लोकतान्त्रिक चरित्र देखाउन कांग्रेसले सरकारलाई दवाव दिदै आएको छ ।सांसद रसाइलीका अनुसार सभामुख र उपसभामुख मध्ये एउटा पद छाड्न सत्तासिन दललाई दवाव दिने विषयमा पनि छलफल भइरहेको छ । कांग्रेसले दुईमध्ये एक पद छाड्नु पर्ने भन्दै यसअघि पनि संसद्मा आवाज उठाउँदै आएको छ ।

यसैगरि आजको बैठकमा संवैधानिक अंगहरु खाली रहेको भन्दै तत्काल पदपूर्ति गर्नका लागि सरकारलाई दवाव दिने बारेमा पनि छलफल भइरहेको छ । संसदीय सुनवाईलगायतका समिति बन्न नसक्दा संवैधानिक अंगहरुमा पदपूर्ति हुन सकेको छैन् ।