विश्वकप क्वार्टरफाइनलमा कसको खेल कहिले कोसँग ? 

काठमाडाैं- रसियामा जारी फिफा विश्वकप फुटबल प्रतियोगिताको क्वार्टरफाइनल समिकरण पुरा भएको छ । मंगलबार राती अन्तिम प्रि–क्वार्टरफाइनलको खेल सकिएसंगै अन्तिम आठमा पुग्ने देशको टुङ्गो लागेको हो । 

क्वार्टरफाइनलमा फ्रान्स, उरुग्वे, रुस, क्रोएशिया, ब्राजिल, बेल्जियम, स्वीडेन र इंग्ल्याण्ड पुग्दा अन्तिम १६ बाटै घर फर्किने अभागि टोलीमा भने अर्जेन्टिना, पोर्चुगल, स्पेन, डेनमार्क, जापान, मेक्सिको, स्विजरल्याण्ड र कोलम्बिया रहेका छन् । 

फ्रान्सले अर्जेन्टिनालाई हराएर अन्तिम आठमा स्थान बनाउँदा उरुग्वेले पोर्चुगललाई पराजित गरेर क्वार्टरफाइनलको यात्रा तय गर्न सफल भएको हो । यस्तै आयोजक रुसले स्पेनलाई, क्रोएशियाले डेनमार्कलाई, ब्राजिलले मेक्सिकोलाई, बेल्जियमले जापानलाई, स्विडेनले स्विजरल्याण्डलाई र इंग्ल्याण्डले कोलम्बियालाई पराजित गर्दै अन्तिम आठमा स्थान सुरक्षित गरेका हुन् ।

अब क्वार्टरफाइनलमा फ्रान्सले उरुग्वे, आयोजक रुसले क्रोएशिया, ब्राजिलले बेल्जियम र इंग्ल्याण्डले स्वीडेनसँग प्रतिस्प्रर्धा गर्ने भएका छन् । फ्रान्स र उरुग्वेबीचको खेल असार २२ गते शुक्रबार बेलुकी पौने ८ बजे हुने छ भने पाँच पटकको विश्वकप विजेता ब्राजिल र उदयमान बेल्जियमबीचको भिडन्त सोही राती पौने १२ बजे हुने छ । 

यस्तै स्विडेन र इंग्ल्याण्डबीचको खेल असार २३ गते शनिबार बेलुकी पौने ८ बजे हुने छ भने आयोजक रुस र क्रोएशियाबीचको भिडन्त शनिबर रातीनै पौने १२ बजे हुने छ । 

समूह चरणमा जर्मनीको बहिर्गमनसँगै सुरु भएको अप्रत्यासित नतिजाको क्रम नकआउट चरणमा पनि रोकिएन । उपाधि दावेदार टोलीहरु स्पेन, पोर्चुगल र अर्जेन्टिनाले यस विश्वकपमा अन्तिम १६ बाट माथि जान सकेनन् ।

यससँगै विश्व फुटबलमा मेस्सी र रोनाल्डो युगको पनि अन्त्य भएको विश्लेषण धेरैको छ । केलिन एमबाप्पे, रोमेलु लुकाकु, ह्यारी केन, नेइमार युगको सुरु भएको मानिएको छ ।