महासमिति बैठकका लागि शीर्ष नेताहरु छलफलमा

काठमाडौं- नेपाली कांग्रेसका शीर्ष नेताहरु आन्तरिक छलफलमा जुटेका छन् । पार्टीको आसन्न महासमितिको बैठकको तयारीका लागि उनीहरु छलफलमा जुटेका हुन् । 

छलफलका लागि पार्टी सभापति शेरबहादुर देउवाले बरिष्ठ नेता रामचन्द्र पौडेल, महामन्त्री शंशाख कोइराला, पूर्वमहामन्त्री कृष्णप्रसाद सिटौलालगायतका नेताहरुलाई डाकेका छन् । 'बैठकमा आउनु पर्यो भनेर सभापति देउवाले फोन गर्नु भएको छ । सायद महासमिति बैठकको बारेमा छलफल गर्न होला ।' नेता सिटौलाले भने ।

पार्टीको आसन्न महासमितिको बैठकको तयारीका लागि दिउसो दुई बजेपछि बस्नेगरी हुन लागेको बैठकमा शिर्ष नेताहरुको बैठक डाकिएको देउवाको निजि सचिवालयले जनाएको छ ।

काँग्रेसको महाधिवेशन पछिको ठुलो कार्यक्रमका रुपमा लिइने महासमितिको बैठक विषेश गरेर पार्टीको विधान संशोधनमा केन्द्रित हुने गर्दछ । हरेक बर्ष बोलाउनु पर्ने बैधानिक व्यवस्था भएपनि देउवा नेतृत्वको केन्द्रीय समिति आएपछि अहिले पहिलो पटक महासमितिको बैठक बोलाइएको छ ।

काँग्रेसका युवा नेताहरु चन्द्र भण्डारी, गगनकुमार थापा लगायतका नेताहरुले निर्वाचनमा पार्टी पराजित भएलगत्तै महासमिति बैठक बोलाउन माग गरेका थिए । उनीहरुकै दवाव अनुसार काँग्रेस केन्द्रीय समितिले आउदो भदौमा महासमितिको बैठक बोलाउने निर्णय गरेको छ । तर मिति र स्थान भने तय भईसकेको छैन ।