अखबार : बाढीपहिरोको वितण्डा, शिक्षामन्‍त्री चलखेलमा

काठमाडौं- राजधानीबाट प्रकाशित मंगलबारका राष्ट्रिय दैनिक पत्रिकाहरुले लगातारको वर्षासंगै आएको बाढी पहिरोले मच्चाएको वितण्डालाई मुख्य समाचार बनाएका छन् । 

आइतबारदेखि देशभर परेको अविरल वर्षासंगै देशका विभिन्न ठाउँमा बाढी पहिरो जाँदा ११ जनाको मृत्यु भएको छ भने हजार भन्दा धेरै घर डुवानमा परेका छन् । विभिन्न ठाउँका राजमार्ग अवरुद्ध भएका छन् भने कतिपय स्थानको उडान समेत ठप्प भएको छ । 

यसै विषयलाई मुख्य समाचार बनाउँदै आजको कान्तिपुर दैनिकले 'बाढीपहिरोको वितण्डाः ११ को मृत्यु, हजार घर डुबे' शीर्षकमा मुख्य साचाचार छापेको छ ।

उसले समाचारमा लेखेको छ –देशका विभिन्न भागमा आएको बाढीपहिरोले ११ जनाको मृत्यु हुनुका साथै तराई क्षेत्रमा हजार भन्दा बढी घर डुवानमा परेका छन् । डुवानग्रस्त क्षेत्रका पीडित घर छाडेर सुरक्षित स्थानतर्फ लागेका छन् भने सरकारको उद्धार प्रयास अत्यन्तै फितलो देखिएको छ । गृहमन्त्रालयका अनुसार अत्याधिक वर्षाबाट ८ जिल्ला प्रभावित भएको कान्तिपुरले लेखेको छ । 

अन्नपूर्ण पोस्टले पनि बाढीपहिरोको वितण्डालाई नै मुख्य समाचार बनाउँदै 'पहाडमा पहिरो, मधेसमा बाढीः कम्तिमा दर्जनको मृत्यु' शीर्षकमा खबर छापेको छ । बाढीपहिरो जोखिम बढेसंगै गृहमन्त्रालयले ७७ वटै जिल्लाका प्रमुख जिल्ला अधिकारीलाई जिल्ला नछाड्न सर्कुलर जारी गरेको पनि अन्नपूर्णले लेखेको छ । 

'असारे झरीले पहाडमा पहिरो, तराईमा डुवान' शीर्षकमा एङ्कर न्युज छापेको आजको नयाँ पत्रिका दैनिकले 'आफैँले ल्याएको कानुनविपरीत सम्बन्धन दिने शिक्षामन्त्रीको तयारी' शीर्षकमा मुख्य समाचार छापेको छ ।

उसले लेखेको छ – अघिल्लो पटक शिक्षामन्त्री हुँदा आफैले बनाएको नियमलाई लत्याउँदै शिक्षामन्त्री गिरिराजमणी पोखरेलले नयाँ नियम बनाउने तयारी गरेका छन् । अघिल्लो पटक विद्यालय चलाउन आफ्नै जग्गा र भवन अनिवार्य हुनु पर्ने नियम बनाएका उनले यसपाली भने मेडिकल कलेज चलाउन अस्पताल नभए पनि हुने नियम बनाउने तयारी गरिरहेका छन् । 

नागरिक दैनिकले भने चिकित्सा शिक्षा विद्येयक बनाउदा प्रस्तावनामै चलखेल भएको विषय र बजेट सक्नकालागि गरिने असारे विकास अझै नरोकिएको विषयलाई प्राथमिकताका साथ छापेको छ । उसले नेपालमा कानुनी रुपमा अवैद्य खेल मानिने तास १ वर्षमा १२ करोडको आयात हुने गरेको खबर पनि पहिलो पृष्ठमा छापेको छ ।