निर्वाचनको चर्चासँगै मतदाता नामावली दर्ता गर्नेको लहर

कपिलवस्तु- सरकार ढल्ने र गठन हुने प्रक्रियासँगै देशमा अर्ली इलेक्सन र स्थानीय निर्वाचनको चर्चा चल्न सुरु गरेको छ। निर्वाचन कहिले हुने भन्ने टुंगो नलागे पनि कपिलवस्तुमा मतदाता नामावली दर्ता गर्न उत्साह छाएको छ। नामावली दर्ताका लागि दैनिक सयभन्दा धेरै जनता आउने गरेको जिल्ला निर्वाचन कार्यालय कपिलवस्तुका प्रमुख ज्ञानुराम पन्थीले बताए। 

कार्यालयका अनुसार चालू आर्थिक वर्षमा मात्र नौ हजार ६७७ मतदाता थपिएका छन्। कार्यालयमा नामावली दर्ताका लागि महिलाको चहलपहलसमेत बढेको छ। सरकारले बाल पोषण अनुदानका लागि कपिलवस्तु जिल्ला छनोट गरेपछि मधेसी र मुस्लिम समुदायका महिलाले नागरिकता बनाउन चासो दिएका थिए। नागरिकता बनेसँगै उनीहरू मतदाता नामावलीमा दर्ताका लागि कार्यालयमा आउने गरेको बताइएको छ। 

जिल्लाका तीनवटा निर्वाचन क्षेत्रमा चालू आर्थिक वर्षमा चार हजार ४६८ महिला मतदाता थप भएका छन्। यसैगरी पाँच हजार २०९ पुरुष मतदाता थप भएका छन्। जिल्लाभर कुल मतदाताको संख्या तीन लाख ५० हजार ११४ रहेको छ, जसमध्ये एक लाख ५९ हजार ९३ महिला र एक लाख ९१ हजार १९ जना पुरुष छन्। 

जिल्लामा दुई जना तेस्रो लिंगीसमेत मतदाता नामावलीमा समावेश भएका छन्। हाल जिल्लामा निर्वाचन कार्यालयको अलावा जिल्ला प्रशासन कार्यालय कपिलवस्तु र इलाका प्रशासन कार्यालय चन्द्रौटाबाट समेत नामावली दर्ता भएको बताइएको छ। मतदाता नामावलीमा दर्ता गर्नेको संख्या बढे पनि दर्ता केन्द्रको संख्या कम हुँदा सेवाग्राहीलाई सास्ती भएको सामाजिक अभियन्ता शिवलाल यादवले बताए।