बाँकेमा बाढीले सयौं घर डुबानमा, हुलाकी सडक भत्कियो, चारको मृत्यु 

नेपालगन्ज : यस क्षेत्रमा आईतबार बेलुका देखि परेको अविरल बर्षाका कारण आएको बाढीमा परि बाँकेमा चार जनाको मृत्यु भएको छ । बाँके बैजनाथ गाउँपालिकामा २ र कोहलपुर नगरपालिका तथा डुडुवा गाउँपालिकामा एक/एक जनाको मृत्यु भएको छ । 

जिल्ला प्रहरी कार्यालय बाँकेका एसपी टेक बहादुर तामाङ्का अनुसार, मृत्यु हुनेमा बाँके, बैजनाथ गाउँपालिका वडा नम्बर ३ निवासी ६५ बर्षिय तुलाराम बुढा, बैजनाथ ५ निवासी ३५ बर्षिय लोकबहादुर सुनार, कोहलपुर नगरपालिका वडा नम्बर ४ गौवागाउँ निवासी ४ बर्षिय बालक रन्जित पासी र डुडुवा गाउँपालिका वडा नम्बर २ निवासी ४ बर्षिया रिमा कुमारी यादव रहेका छन् ।
एसपी तामाङका अनुसार, सुनारलाई स्थानीय ज्वालीपुर नाला र बुढालाई जेठी नालाले बगाएको थियो । खोला तर्ने क्रममा ती दुबै जनालाई बगाएको एसपी तामाङले जानकारी दिए । यसैगरी कोहलपुरस्थित गौवागाउँ निवासी बालक रन्जितको घर नजिकको खाल्डोमा डुबेर मृत्यु भएको प्रहरीले जनाएको छ । सडकबाट चिप्लिएर नालामा लडेका बालक मृत अवस्थामा फेला परेका थिए । डुडुवाकी रिमाको घर नजिकैको पानीमा डुबेर मृत्यु भएको हो । मृतक चारै जनाको शव भेटिसकेको प्रहरीले जनाएको छ ।

 नेपालगन्ज उपमहानगरपालिका, कोहलपुर नगरपालिका तथा बैजनाथ, खजुरा, जानकी, राप्तीसोनारी, नरैनापुर र डुडुवा गाउँपालिकाका विभिन्न घरहरु डुबानमा परेको प्रहरीले जनाएको छ । बाढी पसेर केही घरहरु समेत भत्किएका छन् । डुबान प्रभावित क्षेत्रमा सुरक्षाकर्मीलाई खटाइएको एसपी तामाङले बताए । 

नेपालगन्जको मुख्य सडकसहित उपमहानगरभित्रका दर्जनौ घर डुबेका छन् । न्युरोड, सहिद सेतु बिक चोक, घरबारी टोल, बेलासपुर लगायत स्थान डुबानमा परेका हुन् । न्युरोडका स्थानीय बासिन्दा घनश्याम थापाले ५० वटा भन्दा बढी पसल डुबेको बताए । ‘पानी बग्ने निकास पनि नहुँदा पसल डुबानमा  परेका हुन्,’ श्रेष्ठले भने । उपमहानगरको डुबान प्रभावित स्थानमा दिनभर डोजर र सुरक्षाकर्मी परिचालन गरेर पानीको निकास खोलिएको थियो ।

स्थानीय बासिन्दाका अनुसार न्युरोड, सहिद सेतु बिक चोक, घरबारी टोलमा रहेका पसल तथा होटलभित्र एक फिट भन्दा बढी पानी पसेको छ । नेपालगन्ज उपमहानगरपालिकाले समयमा ठुला नाला सफाई नगर्दा निकास थुनिएर डुबानमा परेको श्रेष्ठको आरोप छ । ‘उपमहानगरपालिकाले ठुला नाला सफाई गरेको भए यस्तो समस्या आउने थिएन,’ उनले भने ‘बजेट भएर पनि हाम्रा जनप्रतिनिधीको ईच्छा शक्ति भएन ।’ पानी पसेपछि पसलमा रहेका सामान भिजेका छन् ।
 
यस्तै नरैनापुरको कट्कुइँया, लक्ष्मणपुर, कालाफाँटा, नरैनापुर, मटेहिया र गंगापुरका दर्जनौं घर डुबानमा परेका छन् । पानीको सहज निकास नभएका कारण सयौं घरहरु डुबेका हुन् । 
 
बाढीले हुलाकी सडक भत्कायो
अविरल वर्षका कारण आएको बाढीले हुलाकी सडक भत्काएको छ । सडक भत्किदाँ राप्तीपारी क्षेत्र र सदरमुकाम नेपालगन्जको सडक सम्पर्क बिच्छेद भएको छ । निर्माणाधिन हुलाकी सडक ठाउँ–ठाउँमा भत्किएको स्थानीय बासिन्दाले बताएका छन् । कतिपय खोलामा पुल तथा कल्भर्ट निर्माण नहुँदा खोलाले सडकमा क्षति पु¥याएको उनीहरुको भनाई छ ।