प्रदेश २ को राजधानी हिलाम्य : दर्जनौ गाउँ डुबानमा

जनकपुरधाम-लगातारको वर्षाले धनुषाका दर्जन बढी गाउँ डुबानको जोखिममा परेका छन् । आइतबारबाट निरन्तर भइरहेको वर्षाले पूर्वी धनुषाका अधिकांश गाउँ बाढीको जोखिममा परेका छन् । 

लगातारको वर्षाले धनुषाको सखुवा मडान, सुन्दरपुर, दुब्बरकोट हथलेटवा, सिंग्याही मडान, पतनुखा, बलहा सघारा, कठाल लगायतका गाउँहरु बाढीको जोखिममा परेका छन् । कमलानदी छेउका यी गाउँहरु हरेक वर्ष बर्खा मौसममा बाढी र डुबानको जोखिममा पर्ने गरेका छन् । 

लगातारको वर्षाले गाउँ जलमग्न भएका छन् भने सदरमुकाम जनकपुरसँगको यातायातसमेत सम्पर्क विहीन अवस्थामा छ । जीर्ण रहेका त्यस भेगका सडकमा वर्षाका कारण यातायातका साधन गुड्न नसकेपछि सदरमुकामबाट सम्पर्क विहीन हुने अवस्था आएको स्थानीयको भनाई छ । 

बाढी नियन्त्रण र क्षतिबाट जोगिनसमेत स्थानीय तहहरुले पूर्व तयारीतर्फ ध्यान नदिएको मंगरहाका स्थानीय अर्जुन मण्डलले बताए । मण्डलका अनुसार बाढीको पानी गाउँहरुमा प्रवेश नगरेपनि लगातारको वर्षाले गाउँहरु जलमग्न भइसकेको छ । सोमबार थप वर्षा भए बाढीको पानी गाउँहरुमा छिर्ने निश्चित रहेको उनको भनाई छ ।

धनुषाका प्रमुख जिल्ला अधिकारी गोविन्द पराजुलीले नदीहरुमा पानीको सतह बढेपनि खतराको संकेत तत्काल नदेखिएको जनाए । आपतकालीन अवस्थाको लागि आफूहरु तयारी अवस्थामा रहेको जिल्ला विपद व्यवस्थापन समितिका अध्यक्ष समेत रहेका पराजुलीले नेपाल समयलाई जानकारी दिए । 

बाढीको जोखिमलाई दृष्तिगत गरी नेपाल प्रहरी, सशस्त्र प्रहरी, जिल्ला वन कार्यालयका कर्मचारीसहितको एक टोलीलाई सोमबार बिहानै रातुदेखि कमला नदी छेउछाउमा अनुगमन गर्न पठाइएको पराजुलीले बताए ।

प्रदेश २ को राजधानी जनकपुर जलमग्न

दुई दिनदेखि भइरहेको वर्षापछि प्रदेश २ को राजधानी जनकपुर जलमग्न भएको छ । अत्याधिक वर्षापछि करिब ५ किलोमिटर लम्बाई रहेको परिक्रमा सडक बाहेक अधिकांश सडक जलमग्न र हिलाम्य भएका छन् ।

निर्माणको क्रममा रहेको प्रमुख व्यापारिक केन्द्र जनक चोक–भानु चोक, जानकी मन्दिर–जनक चोक, जानकी मन्दिर–महावीर चोक सडक खण्ड हिलाम्य भएपछि हिँडडुल गर्न समेत समस्या उत्पन्न भएको छ । बर्खा आउनुपूर्व सरोकारबला निकायले निर्माणतर्फ चासो नदिँदा स्थानीय समस्या भोग्न वाध्य भएको व्यवसायी विजय साहले बताए । 

वर्षाका कारण उपमहानगरपालिकाको वडा नम्बर १, २, ४, १०,१३, लगायतका स्थानमा सडकहरु जलमग्न भएका छन् ।

विकास निर्माणमा रुपैयाँ खर्चको भन्दै नारा घन्काउँदै आएका स्थानीय तहका निर्वाचित जनप्रतिनिधिहरुको पोल दुई दिनको वर्षाले खोलेको जनकपुर–८ का दिपक ठाकुरले बताए ।

गत वर्ष आएको बाढीबाट धनुषामा मात्रै ६९३ घर पूर्ण रुपमा क्षति भएको थियो भने ३ हजार ६ सय ७१ घरमा आंशिक क्षति भएको थियो । त्यसैगरी गत वर्ष बाढीको कारण २१ हजार ९ सय ६३ हेक्टरमा लगाइएको ९ लाख २५ हजार ६ सय ४६ मेट्रिक धान र ४३१ हेक्टर क्षेत्रफलमा पालिएको माछा क्षति भएको थियो । 

गत वर्षको बाढीमा धनुषामा २ पुरुष र १ महिला गरी तीन जनाको ज्यान समेत गएको थियो । गत वर्ष संकलन गरिएको तथ्यांक अनुसार धनुषामा २ अर्ब ३ करोड ३३ लाख ४८ हजार मूल्य बराबरको धनक्षति भएको थियो ।