काठमाडौंका सडकमा बाढी, ट्याक्‍शी पनि डुब्‍न थाले (भिडियोसहित)

काठमाडौं– काठमाडौं टेकुनजिकको सडक सोमबार बाढीले भरिएको थियो । बा१ज ३९३ नम्बरको ट्याक्सी चालकलाई यात्रुलाई गन्तव्यमा पुर्‍याउने हतारो थियो । त्यही हतारोबीच उनले ट्याक्सीलाई सडकमा जमेको पानीमा दौडाउन खोजे । बाढीको पानी साना सवारी साधन नै डुब्ने गरी जमेको थियो । भयो पनि त्यस्तै । ट्याक्सी पानीमा पस्यो । चालक काठमाडौं कपनका बद्री चौलागाईंले चलाखीपूर्वक यात्रुलाई भने बाहिर निकाले ।

सडकको दूरावस्थाको भिडियो हेर्नुहोस्



आसपासमा रहेका सवारी साधन र स्थानीय बासिन्दाको प्रयासमा ट्याक्सीलाई डोरी लगाएर बाहिर निकाल्ने प्रयास शुरु भयो । शुरुमा बाँधिएको डोरी चुँडियो । दोस्रो पटक डोरी बाँधेर करिब आधा घण्टाको प्रयासपछि मात्र ट्याक्सीलाई पानीबाट बाहिर निकाल्न सफलता मिल्यो । स्थानीय बासिन्दा प्रश्न गर्दै थिए, ‘यो सडक हो कि जलमार्ग ?’