एमाले अधिवेशन: लुम्बिनीका ११ पालिकामा विवाद

बुटवल- सर्वसहमति बनाउन खोज्दा लुम्बिनीका ११ पालिकामा एमालेको अधिवेशन लम्बिएको छ। १ सय ९ पालिकामध्ये ९८ मा नेतृत्व चयन भएको छ। 

सर्वसम्मत नेतृत्व चयनका लागि आकांक्षीलाई मनाउने नाममा अधिवेशन लम्बिएको हो। रुपन्देहीमा एमाले महासचिवद्वय विष्णु पौडेल र घनश्याम भुसाल पक्षमा नेतृत्वमा विभाजित भएका छन्। 

भुसालको गृहनगर तिलोत्तमामा पौडेल पक्षले दाबी नछाडेपछि सर्वसहमतीको प्रयास विफल भएको हो। रुपन्देहीको तिलोत्तमा नगरपालिका सहित देवदह नगरपालिका, सिद्धार्थनगरपालिका र सियारी गाउँपालिकामा अधिवेशन सम्पन्न हुन सकेको छैन। बुटवल उपमहानगरपालिकामा समेत अध्यक्ष र उपाध्यक्षमा सहमति भए पनि सचिव र दुई वटा उपसचिवमा कुरा मिलेको छैन। 

बर्दियाको राजापुर गाउँपालिका र गेरुवा गाउँपालिकामा बाढी पहिरो प्रभावित क्षेत्र भएका कारण कार्तिक १५ गतेका लागि अधिवेशनको मिति तय गरिएको छ। गुल्मीका दुई वटा पालिकाहरु मदाने र धुरकोट गाउँपालिकामा आंकक्षी धेरै भएपछि सहमति जुट्न नसक्दा हालसम्म नेतृत्व चयन हुन सकेको छैन। बाँकेको कोहलपुर नगरपालिका, रोल्पाको थवाङ, लिवाङमा बिहीबार अधिवेशन गर्ने गरी कार्यक्रम तय गरिएको एमाले लुम्बिनी प्रदेशले जनाएको छ। 

 नवलपरासीको सुनवल र बर्दघाट बाहेकका सबै पालिकामा सहमतिमै नेतृत्व चयन भएको एमालेले जनाएको छ। लुम्बिनीका चार वटै उपमहानगरपालिकामा भने नेतृत्व सर्वसम्मत निर्वाचित भएका छन्। 

बुटवल उपमहानगरपालिकामा किशन ज्ञवाली, तुलसीपुर उपमहानगरपालिकामा माधव वली, घोराही उपमहानगरपालिकामा भुवन चौधरी र नेपालगञ्ज उपमहानगरपालिकामा दत्तप्रसाद आचार्य अध्यक्षमा निर्वाचित भएका छन्।