नेकपा एकिकृत समाजवादीले लुम्बिनीमा कात्तिक मसान्तत्रि जनवर्गीय संगठन गठन गर्ने

बुटवल- नेकपा एकिकृत समाजवादीले लुम्बिनी प्रदेशमा कात्तिक मसान्तभित्र जनवर्गिय संगठन गठन गर्ने निर्णय गरेको छ। नेकपा एकिकृत समाजवादी लुम्बिनी प्रदेशको  सोमबार बुटवलमा बसेको सचिवालयको बैठकले संगठन विस्तारलाई तिव्रता दिने निर्णय गरेको हो।

बैठकले कात्तिक मसान्तभित्र जनवर्गीय संगठन निर्माण लगत्तै मंसिर ३ देखि १६ गतेसम्म लुम्बिनीका १२ वटै जिल्लामा प्रशिक्षण कार्यक्रम सञ्चालन गर्ने भएको छ। ३ गते बर्दियाबाट शुरु हुने प्रशिक्षण कार्यक्रम १६ गते रुपन्देहीमा समापन गरिने समाजवादीका लुम्बिनी प्रदेश सचिव राजु गुरुङले जानकारी दिए।

उनका अनुसार पार्टी अध्यक्ष माधव कुमार नेपालको प्रमुख आतिथ्यतामा मंसिर २५ गते प्रदेशस्तरीय बृहत प्रशिक्षण कार्यक्रम गर्ने निर्णय भएको छ।

समाजवादीका केन्द्रीय सचिव एंव लुम्बिनी प्रदेश इन्चार्ज भागवत विश्वासीको प्रमुख आतिथ्यतामा बसेको बैठकले विभिन्‍न कार्यविभाजन समेत गरेको छ। बैठकले पार्टीका केन्द्रीय सदस्य तथा रुपन्दही इन्चार्ज डा. बालकृष्ण्ण चापागाई प्रचार विभाग प्रमुख, केन्द्रीय सदस्य बृहस्पती अधिकारी स्कूल विभाग प्रमुख, नेता अशोक कोईरालाई संगठन विभाग प्रमुख, प्रदेश सचिव राजु गुरुङ आर्थिक विभाग प्रमुख र सिद्धिचरण भट्टराईलाई प्रदेश कार्यालय सचिवको जिम्मेवारी तोकेको छ।

बैठकले प्रदेश कमिटिलाई १ सय ६१ सदस्यी बनाउने निर्णय गरेको छ। बैठकलाई केन्द्रीय सचिव भागवत विश्वासी, पोलिटब्यूरो सदस्य सोमप्रसाद पाण्डे, लुम्बिनी प्रदेश अध्यक्ष मेटमणी चौधरी, केन्द्रीय सदस्य रुपन्देही इन्चार्ज डा. बालकृष्ण चापागाई लगायतले सम्बोधन गर्दै कम्यूनिष्ट सिद्धान्त अनुसारको पार्टी निर्माणमा जुट्नुपर्नेमा जोड दिएका थिए।

बैठकमा लुम्बिनी प्रदेशबाट केन्द्रीय समितिमा प्रतिनिधित्व गर्ने नेता तथा १२ वटै प्रदेशका जिल्ला अध्यक्षहरुको सहभागिता थियो।