प्रधानमन्त्रीको जनकपुर भ्रमण रद्द

काठमाडौं- प्रधानमन्त्री केपी ओलीको जनकपुर जाने कार्यक्रम अचानक रद्द भएको छ । आइतबार  बिहान प्रधानमन्त्री जनकपुर जाने कार्यक्रम थियो । 

मौसममा आएको खराबीका कारण प्रधानमन्त्रीको जनकपुर भ्रमण रद्द भएको हो । प्रदेश नं २ मुख्यमन्त्री कार्यलयका सचिव हरि फुयालका अनुसार आइतबार बिहानैदेखि पानी परेकाले हेलिकोप्टर उड्न सकेन । र, प्रधानमन्त्री जनकपुर पाएनन् ।

संघीय मामिला मन्त्रालय र प्रदेश २ सरकारले संयुक्त रूपमा आयोजना गर्न लागेको ‘समृद्धिको सपना, सम्पन्न प्रदेश २ को चाहना’ विषयक दुई दिवसीय गोष्ठीको उदघाट्न गर्न प्रधानमन्त्री ओली जनकपुर अाउने कार्यक्रम थियो । 

गोष्ठीको प्रमुख वक्ताका रूपमा नेकपाका वरिष्ठ नेता तथा पूर्वप्रधानमन्त्री माधवकुमार नेपाल शनिबारै जनकपुर अाइसकेका छन् । कार्यक्रममा सहभागी हुन राजपा संयोजक महन्थ ठाकुर शनिबार जनकपुर अाएका थिए । 

गोष्ठीको उद्घाटन सत्रको अध्यक्षता मुख्यमन्त्री लालबाबु राउतले गर्नेछन् भने समापन समारोहको अध्यक्षता प्रदेश २ का सभामुख सरोजकुमार यादवले गर्ने कार्यक्रम छ ।

दुई दिनसम्म चल्ने गोष्ठीमा प्रदेश २ का सम्पूर्ण स्थानीय तहका प्रमुख/उपप्रमुख, जिल्ला समन्वय समितिका अध्यक्ष, गैरसरकारी संस्थाका अध्यक्षसहित करिब चार सय ५० जनालाई आमन्त्रण गरिएको छ ।