जनकपुरधाम– महोत्तरीको एक स्थानीय तहको वडामा निर्वाचन भएको चार वर्षपछि भएको पुनः मतगणनामा निकटतम प्रतिद्वन्द्वी रहँदै पराजित भएका उम्मेदवार विजयी भएका छन्।
महोत्तरीको मनरा सिस्वा नगरपालिका वडा नम्बर १० को वडाध्यक्षका लागि भएको पुनः मतगणना स्वतन्त्र उम्मेदवारको रुपमा रहेका रमेश कुमार राय विजयी भएका हुन्। मतगणनामा धाँधली गरेर निर्वाचनमा पराजित गराएको भन्दै स्वतन्त्र रुपमा उम्मेदवारी दिएका राय २ मतको झिनो मतान्तरले ४ वर्षदेखि वडाध्यक्षको हैसियतमा रहँदै आएका अरुणकुमार चौधरीलाई पराजित गरेका छन्।
रायले २ सय ६८ मत ल्याए भने चौधरी भने २ सय ६६ मत मात्रै ल्याउन सके। २०७४ साल असोज २ गते भएको स्थानीय तहको निर्वाचन अन्तर्गत मनरा सिस्वा नगरपालिका वडा नम्बर १० को परिणाम २०७४ असोज ८ गते प्रकाशित भएको थियो। तर राजपाले टिकट नदिएपछि स्वतन्त्रबाट उम्मेदवारी दिएका रमेश कुमार राय र नेपाली कांग्रेसका उम्मेदवार अरुणकुमार चौधरीले समान २६७ मत ल्याए। दुवैजनाको मत बराबर भएपछि गोलाप्रथाबाट अरुण चौधरी निर्वाचित भएका थिए।
निर्वाचन अधिकृत आमबहादुर बानियाँले बदर मतमध्येबाट ३ मत चौधरीको पक्षमा पारेको आरोप लगाउँदै निकटतम प्रतिद्वन्द्वी रहेका रमेश कुमार रायले अदालतमा मुद्दा दिएका थिए। सोही मुद्दामा उच्च अदालतले २०७५ असार २१ गते १५ दिनभित्र पुनः मतगणना गर्न आदेश दिएको थियो। तर उच्च अदालतको आदेशपछि पनि अरुण कुमार चौधरी सर्वोच्च अदालतसम्म पुगे।
सर्वोच्चले मुद्दाको सुनुवाइ गर्दै २०७७ चैत ६ गते उच्च अदालत जनकपुरको आदेशलाई सदर गरिदियो। त्यसपछि आज भएको मतगणनामा ४ वर्षदेखि वडाध्यक्षको हैसियतमा रहँदै आएका चौधरी २ मतको मतान्तरले पराजित भएका हुन्।