सुरक्षाकर्मीकै मिलेमतोमा तस्करी !

जनकपुरधाम- भारतीय बजारमा तस्करी गर्न तयार अवस्थामा अवैध घरायसी सामग्री प्रहरीले १३ असारमा सीमानजिकको मुखियापट्टी मुसहरनीया गाउँपालिकाबाट बरामद गर्‍यो । 

मुखियापट्टी मुसहरनीया गाउँपालिकाको एक घरमा भण्डारण गरेर राखिएको अवस्थामा प्रहरीले १३ बोरा मरिच र दुई कार्टुन चुरोट नियन्त्रणमा लियो । मुखियापट्टी–६ स्थित रामसागर यादवको घरमा कोठा भाडा लिई एक व्यापारीले ती सामग्री भण्डारण गरेका थिए । 

प्रहरीले १२ असारमा पनि भारततर्फ लैजाँदै गरेको अवस्थामा डेढ सय कार्टुन चिनियाँ स्याउ नियन्त्रणमा लिएको थियो । घर यादवको भए पनि नियन्त्रणमा लिइएका सामान अन्य व्यापारीको रहेको र खोजतलास भइरहेको धनुषाका डीएसपी दीपेन्द्र शाही बताउँछन् । 

स्थानीय बासिन्दाहरू भने ती सामान नगराइन नगरपालिका फुलगामाका एक व्यापारीको रहेको दाबी गर्छन् । बिल तथा कुनै कागजात नरहेका ती सामान प्रहरीले जनकपुर भन्सारमा बुझाएको छ । 
सीमा क्षेत्रमा सशस्त्र प्रहरीका साथै नेपाल प्रहरी तैनाथ रहँदासमेत तस्करी हुन थालेपछि सुरक्षाकर्मीको मिलेमतो रहेको शंका स्थानीय बासिन्दाको छ । प्रहरीसँग लाइन नमिलेको अवस्थामा मात्रै सामानहरू बरामद हुने गरेको केही व्यापारीको दाबी छ । खुला सीमाका कारण पनि तस्करीमा संलग्नहरूलाई सहज भएको प्रहरीको भनाइ छ ।



डीएसपी शाही भने तस्करी फस्टाउन नदिन प्रयासरत रहेको दाबी गर्छन् । उनका अनुसार भारतीय सीमासँग जोडिएका धनुषाका मुखियापट्टी मुसहरनीया, खजुरी, महुवा, इटहर्वा, फुलगामा, महिनाथपुरलगायत विन्दुबाट सबैभन्दा बढी तस्करी हुने गरेको छ । सीमित जनशक्ति र लामो सीमाका कारण तस्करी नियन्त्रण गर्न कठिनाइ हुने गरेको उनको भनाइ छ ।

गत आर्थिक वर्षमा भन्सार कार्यालयले ४६ लाख रुपैयाँबराबरका सामान नियन्त्रणमा लिएको थियो । चालु आवको हालसम्म एक करोड रुपैयाँबराबरका सामान नियन्त्रणमा लिएको छ । 

यस्तै, सशस्त्र प्रहरीले गत आवमा ३२ लाख र चालु आवमा २९ लाख रुपैयाँबराबरको सामान नियन्त्रणमा लिएको छ । नेपाल प्रहरीले गत वर्ष २९ लाख र चालु आवमा एक करोड रुपैयाँबराबरका सामान नियन्त्रणमा लिइसकेको छ ।