लुम्बिनीका मुख्यमन्त्री केसीद्वारा राहत प्याकेज घोषणा गर्ने प्रतिबद्धता

बुटवल- लुम्बिनी प्रदेश सरकारले अविरल वर्षाका कारण बाढी र पहिरोबाट प्रभावितहरुलाई राहत प्याकेज घोषणा गर्ने प्रतिबद्धता जनाएका छन्। मुख्यमन्त्री कुल प्रसाद केसीले बिहीबार प्रेस विज्ञप्ति जारी गरी प्रदेश सरकारको तर्फबाट राहत प्याकेज घोषणासहित किसानहरुलाई परेको पीडामा प्रदेश सरकारले हातेमालो गर्ने प्रतिवद्धता जनाएका हुन्। 

दु:खद घटनामा परि जीवन गुमाएका मृतकका परिवार र अन्‍नवालीमा भएको क्षतिको विषयमा सम्बन्धित निकायसँग परामर्श गरी राहत प्रदान गर्ने मुख्यमन्त्री केसीले बताए। 

प्रदेशका किसानहरुको धानबाली उठाउनका लागि सहयोग गर्न समेत केसीले अपिल गरेका छन्। 

जनप्रतिनिधी, राजनीतिक दल, सुरक्षाकर्मी, राष्ट्रसेवक कर्मचारी, राजनीतिक दलका भातृ एवं शुभेच्छुक संगठन, सामाजिक संघसंस्था, नागरिक समाज, रेडक्रस सोसाइटी, मावनअधिकारकर्मी, सञ्चारकर्मी, विद्यार्थीलगायत सबै जनसमुदायमा सहयोगका लागि सार्वजनिक अपिल समेत विज्ञप्तीमा भनिएको छ। 

अविरल वर्षाका कारण लुम्बिनी प्रदेशमा ३६ हजार ४८० हेक्टरमा पाजा लगाएर काटेको धानमा क्षती पुगेको छ। करिब चार अर्ब ५१ करोड ४२ लाख रुपैयाँको बाली नष्ट भएको कृषि विकास निर्देशनालयले जनाएको छ। लुम्बिनीमा प्युठान र कपिलबस्तुमा एक-एक जनाको बाढीले बगाएर मृत्यु भएको छ भने दुईजना बेपत्ता छन ।