जनकपुरधाम– धनुषालाई सिरहा जिल्लासँग जोड्ने निर्माणाधिन कमला नदीको पुलको अर्को पिलर पनि भासिएको छ। बुधबार दिउँसो धनुषातर्फको ३ नम्बर पिलर भासिएको हो।
अविरल वर्षाका कारण नदीमा बढेको पानीको सतह तथा तेज बहावका कारण पिलर भासिएको हुलाकी सडक निर्देशनालय जनकपुरधामका निर्देशक कृष्णकुमार महतोले बताए। पिलर भासिएलगत्तै निर्देशनालयको प्राविधिक टोली निरीक्षणका लागि कमला पुलमा पुगेको उनले बताए ।
यसअघि अविरल वर्षासँगै आएको ठूलो बाढीले गत असार १७ गते निर्माणाधिन सो पुलको सिरहा तर्फको दोश्रो पिलर भासिएको थियो । कमला नदीको सो निर्माणाधिन पुलको ९९ प्रतिशत काम सम्पन्न भइसकेको थियो। गत साउन महिनामै हस्तान्तरण गरेर संचालनमा ल्याउने तयारी रहेको समयमा गत असार १७ गते पिलर भासिएपछि पुल निर्माणको गुणस्तरमा प्रश्न उब्जेको थियो ।
पुल निर्माणका लागि सुरुमा पप्पु कन्स्ट्रक्सनले २०६८ सालमा ४२ महिनाभित्र सक्ने गरी ठेक्का पाएको थियो। तर, ७ वर्षसम्म पनि निर्माण सम्पन्न नगरेपछि हुलाकी राजमार्ग निर्देशनालय जनकपुरले लुम्बिनी बिल्डर्सलाई २०७८ असार १३ गते काम सक्ने गरी निर्माणको जिम्मा दिएको थियो। निर्माण सम्पन्न नहुँदै पुल भासिएपछि सोको पुनः निर्माण गर्ने काम निर्माण कम्पनी लुम्बिनी बिल्डर्सले नै गर्ने जिम्मा लिएको छ ।