लुम्बिनीमा दसैं अवधिका दुर्घटनामा २४ जनाको मृत्यु

बुटवल– लुम्बिनी प्रदेशमा यस वर्षको दसैको अवधिमा सवारी दुर्घटनामा परी २४ जनाको मृत्यु भएको छ। लुम्बिनी प्रदेश ट्राफिक प्रहरी कार्यालय बुटवलका अनुसार असोज २१ देखि ३१ गतेसम्म ११ जना पुरुष, ८ जना महिला, ३ बालक र २ बालिकाको मृत्यु भएको हो । 

५८ सवारी दुर्घटना हुँदा ६७ जना घाइते भएका छन्। १२ जिल्ला रहेको लुम्बिनीमा अधिकांश दुर्घटना मोटरसाइकलका छन्। दुर्घटनामा परी सबैभन्दा धेरै बाँकेमा ९ जनाले ज्यान गुमाएका छन्। गुल्मीमा ४, बर्दिया र रुपन्देहीमा ३–३ जना, कपिलबस्तु २, पाल्पा, दाङ र रोल्पामा १–१ जनाको दुर्घटनामा परी मृत्यु भएको प्रदेश ट्राफिक प्रहरी कार्यालयले जनाएको छ। 

चाडपर्वका बेलामा अत्यधिक यात्रुको चाप तथा साना सवारी साधनको गती तिव्र भएकाले दुर्घटना हुने गरेको लुम्बिनी प्रदेश ट्राफिक प्रहरी कार्यालय बुटवलका प्रहरी नायव उपरीक्षक डिल्लिनारायण पाण्डेले बताए ।