बाँकेमा हाईभोल्टेजले २ जनाको मृत्यु

नेपालगन्ज : विद्युतको हाई भोल्टेजका कारण बाँकेमा २ जनाको मृत्यु भएको छ । हाई भोल्टेजकै कारण आधा दर्जन पशु चौपायाको पनि मृत्यु भएको छ ।

जिल्ला प्रहरी कार्यालय बाँकेका प्रहरी उपरिक्षक टेक प्रसाद तामांगका अनुसार बाँकेको राप्ती सोनारी गाउँपालिका वडा न. ६ महेमानपुरमा शनिबार बिहान ३ बजेतिर एक्कासी हाई भोल्टेज आउँदा उनीहरुको मृत्यु भएको हो । 

मृत्यु हुनेमा राप्ती सोनारी गाउँपालिका वडा न. ६ महेमानपुरका २४ बर्षिय सुरेश चौधरी र ४२ बर्षिय टिकाराम चौधरी रहेका छन् । सुतिरहेको अवस्थामा हाई भोल्टेज आएर करेण्ट लागेपछि दुवै जनाको मृत्यु भएको हो ।

हाई भोल्टेजकै करेण्टबाट सोही ठाउँकी ३५ बर्षिया तिला शाही घाईते भएकी छन् । उनको हात खुट्टा सबै जलेको अवस्थामा नेपालगन्ज मेडिकल कलेजमा उपचार भइरहेको उपरिक्षक तामांगले जानकारी दिए ।

हाईभोल्टेजकै करेण्टबाट महेमानपुरमै १ राँगा, ३ गाई र ४ वटा बंगुर पनि मरेका छन् । महेमानपुर गाउँमा अधिकांश घरमा विद्युतिय उपकरणहरु जलेको उपरिक्षक तामांगले बताए ।

कसरी हाई भोल्टेज गयो भन्ने बारेमा केही खुल्न नसकेको बताउँदै उपरिक्षक तामांगले प्रहरी र विद्युतका कर्मचारी घटना स्थल पुगेको जानकारी दिए ।