तानसेन–रानीमहल सडकखण्ड दुई दिनदेखि अवरुद्ध

बुटवल– वर्षाका कारण पहिरो गएपछि पाल्पाका ग्रामीण भेगका सडक अवरुद्ध भएका छन्। पाल्पाको पर्यटकीय क्षेत्र रानीमहल जाने सडकमा पहिरोले सडक अवरुद्ध हुँदा घुम्न गएका आन्तरीक पर्यटक अलपत्र परेका हुन्। तानसेन–रानीमहल सडकखण्ड दुई दिनदेखि अवरुद्ध छ। रानीमहल क्षेत्रको हात्तीढुंगा, गाईघाट, बैकुण्ठभीरलगायत क्षेत्रमा पहिरो गएको जिल्ला प्रहरी कार्यालय पाल्पाका प्रहरी नायव उपरीक्षक रामेश्वर त्वातीले जानकारी दिए।

पहिरो हटाउन सम्बन्धित निकायले ढिला गर्दा विभिन्न जिल्लाबाट घुम्न आएका दुई सय बढी पर्यटक अलपत्र परेका स्थानीय पर्यटन व्यवसायीले बताएका छन्। तर, प्रहरी नायब उपरीक्षक त्वातीले भने पहिरो हटाउने डोजर गइसकेकाले साँझसम्म सञ्चालन हुन सक्ने बताए।

दुई दिनदेखि ठूलो वर्षा भएकाले रानीमहल घुम्न पुगेकाहरु त्यतै रोकिएका हुन्। गाडी लिएर पुगेका पर्यटक सडक नखुल्दासम्म त्यहीं बस्नुपरेको हो। पाल्पा–बुटवल सडकखण्ड अवरुद्ध नभए पनि ग्रामीण भेगका सडकमा भने पहिरो गएकाले सडक अवरुद्ध भएको छ।