मन्‍त्रीले बाँडे ६० करोड, नेपालमा दैनिक अर्बको सट्टेबाजी

काठमाडौं- राजधानीबाट प्रकाशित शनिबारका राष्ट्रिय दैनिक पत्रिकाहरुले विविध विषयलाई पहिलो प्राथमिकतामा पारेका छन् । 

उत्तरी सिमामा हुने तस्करीको विषयलाई मुख्य समाचार बनाएको आजको कान्तिपुर दैनिकले संस्कृति पर्यटन तथा नागरिक उड्डयन मन्त्री रवीन्द्र अधिकारीले विभिन्न संस्था र प्रतिष्ठानलाई ६० करोड रुपैयाँ बाँडेको खुलासा गरेको छ । 

समाचारमा उल्लेख भए अनुसार आर्थिक वर्ष सकिन लाग्दा मन्त्री अधिकारीले मन्त्रीस्तरीय निर्णय गरी संस्कृति प्रवद्र्धन कार्यक्रमअन्तर्गत पुजिगत अनुदानका नाममा अन्धाधुन्ध रकम वितरण गरेका हुन् । विभिन्न नेता, साहित्यकार र कलाकारका नाममा खुलेका संस्था र प्रतिष्ठानलाई मनपरी रकम वितरण गरेको कान्तिपुरले लेखेको छ ।  

सोलुखुम्बुमा जिप दुर्घटना हुँदा ७ जनाको मृत्यु भएको विषयलाई एङ्कर न्युज बनाएको आजको नागरिक दैनिकले 'धान निर्यात अब इतिहास' शीर्षकमा मुख्य समाचार छापेको छ ।

उसले लेखेको छ- 'साढे तीन दशकअघिसम्म सेती–महाकालीबाट बंगलादेश, भारतको उडिसालगायतका ठाउँमा धान–चामल निर्यात गरिन्थ्यो । बंगलादेशमा अनिकाल पर्दा यहाँको माटोमा उब्जेको धानले भोक मेटाउथ्यो । तर अहिले समय बद्लिएको छ । धान–चामल निर्यात गर्ने हामी आयात गर्न बाध्य छौ ।' 

अन्नपूर्ण पोस्टले भने भाइरलको जोखिम बढेको विषयलाई मुख्य समाचार बनाएको छ । उसले पत्रकार यादव थपलियाको भाइरलकै कारण निधन भएको उल्लेख गर्दै लेखेको छ– भाइरल इन्फ्लुएन्जाले आकस्मिक रुपमा मृत्युको मुखमा लैजान सक्छ । त्यसैले भाइरलबाट जोगिन भ्याक्सिन लगाउनु पर्छ । 

नेपालमा दैनिक अर्बको सट्टेबाजी हुने गरेको विषयलाई विशेष रिपोर्टका रुपमा प्रस्तुत गरेको शनिबारको नयाँ पत्रिकाले विश्वककप फुटबलका विभिन्न विषयलाई चिरफार गरेको छ । 

उसले क्यासिनोका खेलाडी सट्टेबाजीमा व्यस्त हुने गरेको देखि फ्यान र घरानियाँसम्म सट्टेबाजीमा सक्रिय हुने गरेको विषयको उठान गरेको छ । साँझ ५ बजेबाट सट्टेबाजीको धन्दा सुरु हुने गरेको छ भने बिहान ८ बजे सम्म हिसाब क्लियर हुने गरेको नयाँ पत्रिकाले लेखेको छ ।