कपिलवस्तुको बहादुरगन्जमा हैजा फैलिएको पुष्टि

बुटवल– कपिलवस्तुको कृष्णनगर नगरपालिकको तीन वटा वडामा हैजा फैलिएको पुष्टि भएको छ। गत असोज १८ देखि कृष्णगनरको ७, ८ र ९ नम्बर वडामा झाडापखाला फैलिएपछि गरिएको दिसाको नमुना परीक्षणमा हैजाको जीवाणु फेला परेको स्वास्थ्य कार्यालय कपिलबस्तुले जनाएको छ।

विश्व स्वास्थ्य संगठनको समन्वयमा २१ जना बिरामीको दिशा संकलन गरी परीक्षण गर्दा सो तथ्य फेला परेको स्वास्थ्य कार्यालयका प्रमुख हेमराज पाण्डेयले बताए। काठमाडौंस्थित राष्ट्रिय जनस्वास्थ्य प्रयोगशालामा गरिएको परीक्षणका क्रममा चार जनामा हैजाको जीवाणु फेला परेको उनले बताए।

झाडापखालाबाट हालसम्म चार जनाको मृत्यु भएको छ। मृत्यु हुनेमा ४५ वर्षीय पुरुष, ७ वर्षीय र २ वर्षीय बालक तथा पाँच वर्षीय बालिका छन्। 

२१ नमुनामध्ये ५५ वर्षीय दुई पुरुष, ७२ वर्षीय एक पुरुष तथा पाँच वर्षीय बालिकामा हैजाको जीवाणु भेटिएको कार्यालयले जनाएको छ।

झाडापखालाबाट हालसम्म चार जनाको मृत्यु भएको छ। मृत्यु हुनेमा ४५ वर्षीय पुरुष, ७ वर्षीय र २ वर्षीय बालक तथा पाँच वर्षीय बालिका छन्। यस्तै अहिलेसम्म ८८५ जना संक्रमित भएका छन्। स्वास्थ्य तथा जनसंख्या मन्त्रालयका अनुसार संक्रमितमध्ये २५ जनाको शिवराज अस्पतालमा उपचार भइरहेको छ भने ८१८ जना निको भई डिस्चार्ज भएका छन्। 

स्वास्थ्य कार्यालय कपिलवस्तुका अनुसार पानीको प्रदूषण जाँच गर्न २० गते विभिन्न स्थानबाट ४ वटा नमुना संकलन गरिएको थियो। तीमध्ये एउटा नमुनामा दिसामा पाइने जीवाणु भेटिएको थियो। खानेपानी संस्थान बहादुरगन्जसँग समन्वय गरी पानी प्रदूषण हुन सक्ने कारणबारे खोजबिन गरिएको स्वास्थ्य प्रमुख पाण्डेयले बताए। 

असोज २२ गतेदेखि स्वास्थ्य तथा जनसंख्या मन्त्रालय, स्वास्थ्य सेवा विभाग इपिडेमियोलोजी तथा रोग नियन्त्रण महाशाखाबाट खटिएको टोलीले थप अनुसन्धानका लागि विभिन्न क्रियाकलाप गर्दै आएको छ। ‘खुला रुपमा गरिने दिसापिसाब तथा कमजोर सरसफाइको कारण पानी प्रदूषित भई यस किसिमको समस्या भएको हुनसक्ने सम्भावना प्रबल छ’, स्वास्थ्य कार्यालयले आइतबार जारी गरेको विज्ञप्ति उल्लेख छ। 

प्रकोप नियन्त्रणको अवस्थामा रहे पनि पूर्णरुपमा हटिनसकेको स्वास्थ्य कार्यालयले जनाएको छ। पानी उमालेर वा क्लोरिन प्रयोग गरेर मात्र प्रयोग गर्न र गराउन, व्यक्तिगत सरसफाइ तथा चाडबाडको समयमा खानेकुराको सरसफाइलाई विशेष ध्यान पुयाउन समेत कार्यालयले अपिल गरेको छ।