दरौंदी किनारमा बाबुराम बने हली

काठमाडौं- देश नै १५ असारमा रमाएका बेला पूर्वप्रधानमन्त्री डा. बाबुराम भट्टराईको मन काठमाडौंको डेरामा थामिएन । शुक्रबार उनी गृहजिल्ला गोरखाको सिरानचोक गाउँपालिका पुगे। 

आफू हुर्केको दरौंदी किनारस्थित जरेबर फाँट पुगे । र, अनौ समातेर खेल हिल्याए । डा. भट्टराईलाई साथ दिए, उनका गाउँलेले । खेत जोतेर मात्र उनको रहर पूरा भएन । बाउसे गरे, महिलाहरूसँगै बीउ काढे, गरा सम्याए (स्थानीय भाषामा साउने काम, जसलाई दाँदे लगाउने पनि भनिन्छ) र गाउँलेसँग रमाए । 

उनी १५ असारको उत्सवमा सहभागी भएको जरबरे फाँट गृहनगर पालुङटार नजिकै पर्छ । उनको गाउँ पालुङटार नगरपालिकाको खोप्लाङ हो । 

जरेबर फाँटमा धान दिवसको आयोजना नयाँशक्ति पार्टीको गोरखा जिल्ला समिति र सिरानचोक गाउँपालिकाले संयुक्त रूपमा गरेका हुन् । डा. भट्टराई करिब तीन घण्टा रोपाईंमा सहभागी भएका थिए । 

पार्टी नेता÷कार्यकर्ता र स्थानीय बासिन्दासमेत गरी करिब तीन सय जनाको सहभागिता रहेको नयाँशक्ति गोरखाका नेता रोशन पोखरेलले जानकारी दिए । स्थानीय मिश्रा कुमालको खेतमा शुक्रबार ६ हल गोरु नारिएको थियो । र, डा. भट्टराई कुमालको खेताला बने । 

विगतमा पनि उनी असार १५ पारेर गृहजिल्ला पुग्ने र गाउँलेसँग रमाउने गर्थे । यसपटक भने महिनामा एक दिन मतदातासँग रमाउने उनको नियमित कार्यक्रम यही मौकामा पर्‍यो । नयाँशक्तिका नेता पोखरेलका अनुसार शुक्रबार राति डा. भट्टराई सिरानचोक गाउँपालिका–४ चोरकाटेमा बास बस्ने बस्ने र मतदातासँग अन्तरक्रिया गर्ने कार्यक्रम छ । प्रधानमन्त्री छँदा स्वदेशी उत्पादन मुस्ताङ म्याक्स गाडी चढेर तथा महिनामा एक पटक गाउँ–गाउँ पुगेर बास बस्ने शैलीका कारण डा. भट्टराईले लोकप्रियता कमाएका थिए ।