जनकपुरधाम- विजयादसमीको अवसरमा जनकपुरधाममा करिब एक दशकदेखि हुँदै आएको रावण वध कार्यक्रम यस वर्ष पनि धुमधामका साथ गरिएको छ।
भगवान रामको ससुराली मानिने जनकपुरधाममा मेला भर्न यस वर्ष विभिन्न स्थानबाट सर्वसाधारणको घुइँचो लागेको थियो। १४ वर्षे वनवासपछि रावणसँग युद्धमा भगवान् रामले असत्यमाथि विजय प्राप्त गर्दै आफ्नी श्रीमती सीतालाई रावणको कब्जाबाट मुक्त गराउन सफल भएका थिए। त्यसकै खुशियालीमा जनकपुरधाममा विजयादशमीको दिन रावण वधका लागि विशेष कार्यक्रमको आयोजना देखि हुँदै आएको छ ।
जनकपुरधामस्थित धनुषसागर र गंगासागरको तलाउ वीचमा रहेको डिलमा रावणको प्रतिमा निर्माण गरी धनुषवाणले रावणको वध गरि दहन गर्ने गरिएको हो ।
यस वर्ष राम मन्दिरका पुजारी राम गिरिले रावण वध गरेका छन्।
स्थानीय महावीर युवा कमिटीको आयोजनमा पछिल्लो ८ वर्षदेखि रावणवध र लंकादहन समेत हुँदै आएको छ ।
रामायणमा उल्लेख भए अनुसार रावणका दश वटा टाउका थिए। त्यसैले रावणलाई दशानन्द पनि भनिन्थ्यो । रावणमा दश मान्छे भन्दा बढी बुद्धि र सो बराबरको शक्तिसमेत थियो।