अाजका अखबार : 'घर मिचेर सडक नबढाउनू'

काठमाडौं- राजधानीबाट प्रकाशित शुक्रबार राष्ट्रिय दैनिक पत्रिकाहरुले विविध विषयलाई पहिलो प्राथमिकतामा पारेका छन् । 

नेपाल वायुसेवा निगमले २८० सिट क्षमताको वाइडबडी जहाज भित्राएको प्रसंगदेखि सर्वोच्च अदालतले घर मिचेर सडक नबढाउन आदेश दिएको विषयसम्मलाई आजका अखबारहरुले मुख्य समाचार बनाएका छन् । 

'वाइडबडी जहाजः फराकिलो गन्तव्य' शीर्षकमा मुख्य साचार छापेको आजको नयाँ पत्रिकाले निगमको जहाज यात्राको वर्णन गरेको छ । निगमले नयाँ जहाज आएसंगै कतार दुबईदेखि अष्ट्रेलिया, लण्डनसम्मको सिधा उडान थाल्ने तयारी गरेको नयाँ पत्रिकाले लेखेको छ । 

वाइडबडी जहाज आएको विषयलाई एङ्कर न्युज बनाएको आजको कान्तिपुर दैनिकले वर्षासंगै गएको पहिरोले धादिङमा ९ घर बगाउदा ५ जनाको मृत्यु भएको विषयलाई मुख्य समाचार बनाएको छ ।

नागरिक दैनिकले पहिरोले पाँच जनाको ज्यान लिएको विषयलाई पहिलो पृष्ठमा सामान्य खबर बनाएको छ भने सर्वोच्च अदालतले घर मिचेर सडक नबढाउन आदेश दिएको विषयलाई मुख्य समाचार बनाएको छ ।

समाचारमा लेखिएको छ – सर्वोच्च अदालतले सार्वजनिक बाटो बनाउँदा पहिले जग्गा लिएरमात्र सडक सिमा तोक्न सरकारका नाममा निर्देशनात्मक आदेश गरेको छ । न्यायाधीश केदारप्रसाद चालिसे, हरिकृष्ण कार्की, पुरुषोत्तम भण्डारीको पूर्ण इजलासले बाटो विस्तारविरुद्ध परेको मुद्दामा कसैलाई पनि आवासको हकबाट वञ्चित नगर्न सरकारका नाममा आदेश जारी गरेको हो । 

नागरिक दैनिकले १० महिनामा २४ अर्बको चामल आयात भएको विषयलाई पनि महत्वका साथ पहिलो पृष्ठमा छापेको छ । यस्तै अन्नपूर्ण पोस्टले एकिकृत बस्ति विकास कार्यक्रम सुस्त भएको विषयलाई मुख्य समाचार बनाएको छ ।