बाइडेनको ज्यान बचाउने अमन खलीलीको परिवारले छोड्यो अफगानिस्तान

काबुल- एक समय अमेरिकी राष्ट्रपति जो बाइडेनको ज्यान बचाउने दोभाषी अमन खलीलीको परिवारले अफगानिस्तान छोडेको छ। 

सन् २००८ को हिउँदमा चलेको हिउँसहितको आँधीका कारण अमेरिकी सेनाको हेलिकोप्टर एक हिउँ जमेको घाँटीमा अवतरण गर्न बाध्य भएको थियो। 

अमेरिकी सेनाको उक्त हेलिकोप्टरमा जो बाइडेन पनि थिए। बाइडेन त्यस समय सांसद् रहेका थिए। जुन घाँटीमा अमेरिकी सेनाको हेलिकोप्टर अवतरण भएको थियो, त्यो ठाउँ सुरक्षाका दृष्टिकोणले निकै संवेदनशील रहेको थियो। 

त्यस समय अमेरिकी सरकारका केही अफगान स्टाफले जो बाइडेनसहितका अन्य सांसद्हरुलाई सुरक्षित फिर्ता पठाउनका लागि सहयोग गरेका थिए। उक्त टोलीमा अमन खलीली पनि सहभागी थिए। 

तीनै खलीलीले पछिल्लो समय तालिबानले अफगानिस्तान कब्जा गरेपछि मुलुक छोडेका छन्। अगस्त १५ मा तालिबानले अफगानिस्तान कब्जा गरेको घोषणा गरेको थियो। 

अफगानिस्तानमा तालिबानले कब्जा गरेदेखि नै खलीलीले नै अफगानिस्तान छोड्‍नका लागि अपिल गरेका थिए। अफगानिस्तानमा तालिबानी कब्जाको करिब दुई महिनापछि अलीलीलाई अफगानिस्तान बाहिर निकालिएको हो। 

उनलाई उनको परिवारसहित बाहिर निकालिएको हो। उनीसँगै अफगानिस्तान छोड्‍न चाहेका हजारौं अफगानीहरुलाई पनि अफगानिस्तानबाट बाहिर निकाल्‍ने बताइएको छ। 

अमेरिकी विदेश मन्त्रालयका एक अधिकारीले अमन खलीली र उनको परीवारलाई सुरक्षित बाहिर निकाल्‍न सफल भएको जनाएको छ। 

तालिबानले मुलुकमा कब्जा गरिसकेपछि आफूविरुद्ध लागेका अफगानी लडाकू र अन्य न्यायाधीशहरुलाई खोजी गरिरहेको बताइएको थियो।