मोतीपुर घटनामा पत्रकार आक्रमणको चौतर्फी विरोध

बुटवल– रुपन्देहीको बुटवल–१७ स्थित मोतीपुर औद्योगिक क्षेत्रमा समाचार संकलनमा गएका सञ्चारकर्मीमाथि आन्दोलनकारीले आक्रमण गरेका छन्। प्रहरी र सुुकुम्बासीका नाममा जग्गा अतिक्रमण गरेका नागरिकबीच झडपका विषयमा समाचार संकलनमा गएका बेला सञ्चारकर्मी विश्व ज्ञवालीलाई आक्रमण भएको हो।

आइतबार दिउँसो समाचार संकलनका क्रममा खटिएका लुम्बिनी टेलिभिजन र बुटवल एफएममा कार्यरत सञ्चारकर्मी  ज्ञवाली आन्दोलनकारीको आक्रमणबाट घाइते भएका छन्। उनको टाउकोमा गहिरो चोट लागेको छ। 

घाइते ज्ञवालीको लुम्बिनी प्रादेशिक अस्पतालमा उपचार भइरहेको छ।  पत्रकारहरुमाथि प्रहरी र आन्दोलनकारीले अभद्र व्यवहार गर्दै रिपोर्टिङमा रोक लगाएका थिए। 

नेपाल पत्रकार महासंघ रुपन्देहीले विज्ञप्ति जारी गरी समाचार संकलनमा खटिएका सञ्चारकर्मीमाथि आक्रमण गरी समाचार संकलनमा लगाएको रोकप्रति गम्भीर ध्यानाकर्षण भएको जनाएको छ। समाचार संकलनमा लगाइएको रोकको भत्र्सना गर्दै सहज रुपमा समाचार संकलनको वातावरण मिलाउन महासंघले माग गरेको छ। 

नेपाल पत्रकार महासंघ लुम्बिनी प्रदेश, प्रेस युनियन रुपन्देही, राष्ट्रिय दलित पत्रकार संघ नेपाल लगायतका संगठनले सञ्चारकर्मी आक्रमणको निन्दा गरेका छन्। मोतीपुर क्षेत्रमा केही समयदेखि सुकुम्बासीका नाममा मोतीपुर औद्योगिक क्षेत्रमा घरटहरा बनाउने क्रम बढ्दै गएको थियो। सोही क्रममा आइतबार प्रहरीले टहरा हटाउन थालेपछि झडप भएको थियो।