हात्ती गाउँमा पसेपछि स्थानीयवासी त्रसित

झापा : ज‌ंगली हात्ती गाउँ पसेपछि झापाको ज्यामिरगढी त्रसित बनेको छ । मेचीनगर-१० को सौरभ चिया बगानमा १८ वटा जंगली हात्तीका पसेपछि गाउँ नै त्रसित बनेको हो । 

बुधबार रातिदेखि चिया बगानमा पाँच वटा छावासहित १८ वटा हात्ती पसेका थिए । बिहानैदेखि स्थानीयवासीलाई सकेसम्म घरबाट बाहिर ननिस्कन वडाध्यक्ष गुणराज भट्टराई र इलाका प्रहरी कार्यालय धुलाबारीले सचेत गराएको छ । 

इलाका प्रहरी कार्यालय धुलाबारी र काँकडभिट्टाबाट गएका सुरक्षाकर्मी र सशस्त्र प्रहरीसहितले गाउँमा सुरक्षा प्रदान गरिरहेको वडाध्यक्ष भट्टराईले जानकारी दिए । 

छिमेकी मुलुक भारतबाट आएको जंगली हात्तीलाई दिनभर बगानबाट अन्यत्र जान नदिई सुरक्षा दिने र साँझ परेपछि भारततिरै लखेट्ने इलाका प्रहरी कार्यालय धुलाबारीका प्रमुख खगेन्द्र रिजालले जानकारी दिए । 

हात्ती बसेको चिया बगानबाट दुई किलोमिटरको दूरीमा ज्यामिरगढी माध्यमिक विद्यालय रहेको छ ।