अफगानिस्तानमा शक्तिशाली बम विस्फोट हुँदा ५० जनाको मृत्यु

काबुल- अफगानिस्तानको कुन्दुज सहरस्थित एक मस्जिदमा शक्तिशाली बम विस्फोट हुदा कम्तिमा ५० जना मृत्यु भएको छ। बीबीसीका अनुसार सयभन्दा बढी घाइते भएका छन्। 

शुक्रबार प्रार्थनाको क्रममा सएद अबाद नामको अल्पसंख्यक सिया मस्जिदमा बम विस्फोट भएको हो। घटनाबारे पूर्ण विवरण आइसकेको छैन। 

मृतकको संख्या बढ्नसक्ने बताइएको छ। घाइतेहरुलाई उपचारका लागि स्थानीय अस्पतालमा लगिएको तालिबान अधिकारीले जनाएका छन् । 

अफगानिस्तानबाट अमेरिकी सेना फिर्ता भइसकेपछि यो पहिलो शक्तिशाली बम आक्रमण हो। 

विस्फोटको अहिलेसम्म कुनै समूहले जिम्मा लिएको छैन। यद्पि अफगानिस्तानमा तालिबानले सत्ता कब्जा गरेपछि सशस्त्र समूह आईएसआईएस-केका लडाकूले हमला तीव्र पारेका छन्। 

यसअघि गत साता मात्रै काबुलस्थित एक मस्जिदको मुलगेटमै बम विस्फोट हुँदा चार जना मारिएका थिए।