धादिङमा पहिरोले सात घर बगायो, ५ को मृत्यु, ३ घाइते

धादिङ- धादिङको खनियाँबास र नेत्रावती डपजोङ गाउँपालिकामा पहिरोले ७ घर बगाउँदा ३ जनाको मृत्यु भएको छ भने दुई जना बेपत्ता भएका छन् ।

दुई दिनदेखि परेको वर्षाका कारण खनीयाँबास गाउँपालिका–५ स्थित सत्यदेवीको साईश्वाँरामा गोले जेठा भनिने राजु गोलेको घर बगाउँदा उनकी श्रीमति, २ छोरीको मृत्यु भएको छ ।

श्रीमती ३६ बर्षीया वसोधा गुरुङ, १० बर्षीया छोरी लक्ष्मी गुरुङ र ५ बर्षीया सरस्वती गुरुङको पहिरोमा परी मृत्यु भएको प्रहरीले जनाएको छ । उनीहरुको शव बिहीबार विहान पहिरोबाट निकालिएको छ ।

यस्तै खनियाँबास–४ च्यरीबोटमा गएको पहिरोले घर पुरिदा ६१ वर्षीय शमसेर घले र उनकी श्रीमती कोप्ची घलेको मत्यु भएको जिल्ला प्रहरी कार्यालय धादिङले जनाएको छ । 

पहिरोले पुरिएका घले दम्पतीलाई स्थानीयको सहयोगमा इलाका प्रहरी कार्यालय दार्खाबाट खटिएको टोलीले निकालेको थियो ।  सोही गाँउमा पहिरोले घर बगाउँदा दिपक गोतामे, लक्ष्मी गोतामे, कल्पना र २ वर्षका रवि घाइते भएका छन् ।

यसैगरि नेत्रावती डपजोङ गाउँपालिकाको मार्पाकमा पाँच घर पहिरोले बगाएकोे छ । तर के कति मानविय क्षति भयो भन्ने विवरण प्राप्त हुन सकेको छैन् । घटना स्थल सदरमुकामबाट एक दिनको पैदल दूरीमा पर्दछ । 

वर्षाका कारण जिल्लाको उत्तरी भेगतर्फ जाने सडक भत्किएकाले सदरमुकामबाट गाडी चल्न छाडेको छ । ईलाका प्रहरी कार्यालय दार्खाको प्रहरी टोली भने चिउरीखर्क पुगिसकेको छ भने साईश्वाँरामा प्रहरीको टोली अझै पुग्न सकेको छैन ।