वीरगन्जमा दसैंको रौनक, सीमावर्ती क्षेत्रको सुरक्षा व्यवस्थामा कडाइ

पर्सा- नेपालीको महान् चाड दसैं आजबाट सुरु भएको छ। प्रत्येक वर्ष आश्विन शुक्ल प्रतिपदादेखि पूर्णिमासम्म दसैं मनाइन्छ। बडा दसैंको पहिलो दिन आज घरघरमा घटस्थापना गरी दियो, कलश र गणेश स्थापना गरेर वैदिक विधिपूर्वक देवी दुर्गाको पूजा आराधना गरिन्छ। 

पर्सामा पनि घटस्थापनाको पहिलो दिन आज वीरगंजको प्रसिद्ध गहवामाई मन्दिरमा भक्तजनको घुइँचो लागेको छ। आजबाट नवरात्र सुरु भएको अवसरमा विभिन्न चोक-चोकमा माता दुर्गाको मूर्ति बनाई पूजा पाठ गरिँदै छ। 

घटस्थापनाको पहिलो दिन आज बिहानै नुहाएर नजिकको नदी वा चोखो स्थलबाट माटो ल्याई गाईको गोबरले लिपपोत गरिएको पूजाकोठा अथवा दसैं घरमा विधिपूर्वक राखेर त्यसमाथि जौ रोपिन्छ। यसलाई जमरा राख्ने पनि भनिन्छ। 

दसैंको अवसरमा पर्सामा विशेष सुरक्षा व्यवस्थासमेत लागू भएको छ। विभिन्न चोक तथा सीमावर्ती क्षेत्रमा सदा पोसाकका प्रहरी खटाएर शान्ति सुरक्षा कायम गराउन लागिएको पर्साका प्रहरी नायब उपरीक्षक ओम प्रकाश खनालले बताए। 

खासगरी सीमावर्ती क्षेत्रमा लुटपाट, धाक धम्की आउने खालका सूचनालाई तदारुकताका साथ नियन्त्रण गराउने उद्देश्यले जिल्लामा रहेका ९ सय ६३ प्रहरी परिचालन गराइएको हो। 

दसैं चाडबाडमा भिडभाडलाई मध्य नजर गर्दै थप दैविक प्रकोपबाट ५० जना प्रहरी रिजर्भका लागी माग गरिएको प्रवक्ता खनालले जानकारी गराएका छन्।