सीता भण्डारी प्रकरण : श्रीमानसहित ३ जनालाई पुर्पक्षका लागि थुनामा राख्‍न आदेश

बुटवल- रुपन्देहीको तिलोत्तमाकी सीता भण्डारी पौडेलको आत्महत्या दुरुत्साहन मुद्दामा पक्राउ परेका तीन जनालाई पुर्पक्षका लागि थुनामा राख्‍न रुपन्देही जिल्ला अदालतले आदेश दिएको छ। अदालतले मंगलबार र बुधबार भएको थुनछेक बहसदले सिताका श्रीमान, जेठाजु र अमाजूलाई थुनामा राख्‍न आदेश  दिएको हो।

अदालतको फैसला अनुसार श्रीमान टीका पौडेल, जेठाजु हरि पौडेल  र आमाजू विष्णु पौडेल कारागार चलान भएका हुन्। अदालतको आदेशपछि बुधबार नै कारागार चलान गरिएको जिल्ला प्रहरी कार्यालय रुपन्देहीले जनाएको छ।  गत भदौ २० गते तिलोत्तमा नगरपालिका वडा नं.५ बस्‍ने वर्ष २७ की सीता भण्डारी पौडेलको शव भेटिएको थियो। 

सीताका माइती पक्षले भने आत्महत्या नभइ हत्या नै भएको दाबी गर्दै आएका छन्। तर, प्रहरीले भने पोस्ट मार्टम रिपोर्ट र सीआईबीको टोलीले गरेको अनुसन्धानमा समेत आत्महत्या देखिएको भन्दै आत्महत्या दुरुत्साहन मुद्दा अघि बढएको हो। प्रहरीको अनुसन्धान प्रतिवेदन अनुसार अदालतमा सरकारी वकिल कार्यालयले अभियोजना गरेको रुपन्देहीका प्रहरी नायब उपरीक्षक एवं प्रवक्ता सत्यनारायण थापाले बताए।