जनकपुरधाम- प्रदेश २ को लोकसेवा आयोगले प्रदेश प्रमुख हरिशंकर मिश्रलाई आफ्नो दोस्रो वार्षिक प्रतिवेदन पेश गरेको छ। सोमबार आयोगका अध्यक्ष सुरेन्द्र प्रसाद यादवले प्रदेश प्रमुख मिश्र समक्ष आफ्नो वार्षिक प्रतिवेदन पेश गरेका हुन्।
आयोगले गत वर्ष बढुवा, अन्तर सेवा, तथा खुला र समावेशी गरी कुल १६५ वटा विज्ञापनहरुबाट २७२ पदको लागि विज्ञापन प्रकाशित गरेको प्रतिवेदनमा उल्लेख गरेको छ।
जसमा बढुवातर्फ ११३ पद, अन्तर सेवातर्फ १४, खुलातर्फ ९५ र समावेशी समूहतर्फ ५० पदको लागि विज्ञापन गरेको आयोगको प्रतिवेदनमा भनिएको छ।
आयोगले कर्मचारीको अभाव भए पनि गत वर्ष विभिन्न सेवा र विभिन्न तहका पदका लागि ८५ वटा पाठ्यक्रमहरु निर्माण गरेको आयोगका अध्यक्ष यादवले बताए।
उनले आयोगमा प्रदेश सरकारबाट २१ जनाको अस्थायी दरबन्दी रहेकोमा हाल काजका ६ जना र करारका ५ जना कर्मचारीले मात्र कार्यसम्पादन भइरहेको बताए। यद्यपि उनले यस अवधिमा ८५ वटा पाठ्यक्रमको निर्माण गरेको बताए।
आयोगले गत वर्षको फागुन २२ र २९ गते सञ्चालन गरेको अधिकृत सातौं तह इन्जिनियरीङ् सेवाको २ हजार ३४८ जना परीक्षार्थीको लागि परीक्षा सञ्चालन गर्दा १९६ जना परीक्षार्थीहरु सहभागी भएको प्रतिवेदनमा उल्लेख छ।