सिके राउतका कार्यकर्ताद्वारा जनकपुर उपमहानगरमा तोडफोड, मुख्यमन्त्री कार्यालय घेराउ

जनकपुरधाम- प्रदेश २ मा भ्रष्टाचार बढ्दै गएको भन्दै सिके राउत नेतृत्वको जनमत पार्टीले मुख्यमन्त्री कार्यालय घेराउ गरेको छ। 

प्रदेश २ मा अख्तियारको छापाविरुद्ध जनता समाजवादी पार्टी आन्दोलित रहेको समयमा जनमत पार्टीका नेता कार्यकर्ताहरुले मुख्यमन्त्री कार्यालय घेराउ गरेको हो। यद्यपि मुख्यमन्त्री कार्यालय घेराउ गर्नका लागि पुगेका जनमत पार्टीका कार्यकर्ताहरुलाई बाक्लो संख्यामा परिचालन गरिएका प्रहरीले मुल ढोका बाहिरै रोकेको छ।

मोटरसाइकल जुलुससहित मुख्यमन्त्री कार्यालय घेराउ गर्नका लागि पुगेका कार्यकर्ताहरुले मुख्यमन्त्रीविरुद्ध केही बेर चर्को नाराबाजी गर्दै फर्किएका थिए। 

मुख्यमन्त्री कार्यालय घेराउ गर्नअघि उनीहरुले जनकपुरधाम उपमहानगरपालिकामा तोडफोड गर्नुका साथै तालाबन्दी गरेका छन्। विभिन्‍न माग राख्दै जनकपुरधाम उपमहानगरपालिका पुगेका जनमत पार्टीका कार्यकर्ताहरुलाई उपमहानगर परिसरमा प्रवेश गर्न नदिइएपछि नाराबाजी गर्दै नगरपालिकामा तोडफोड गरेका हुन्।

प्रदर्शनकारीहरुले उपमहानगरपालिकामा जबरजस्ती प्रवेश गरेर न्यायिक समितिमा तोडफोड गर्नुका साथै नगरप्रमुख लालकिशोर साहको कार्यकक्षमा तालाबन्दी गरेका छन्।