ताइवानको हवाई क्षेत्रमा फेरि चिनियाँ सैन्य विमान प्रवेश

ताइपेई- ताइवानले आफ्नो हवाई क्षेत्रमा फेरि चिनियाँ लडाकू विमानहरु प्रवेश गरेको बताएको छ। शुक्रबार ३८ वटा विमानहरु प्रवेश गरेकोमा शनिबार ३९ वटा विमानहरु प्रवेश गरेको बताइएको छ। 

ताइवानले शनिबारको सैन्य विमानको प्रवेश अहिलेसम्मकै सबैभन्दा बढी भएको जनाएको छ। ताइवानको रक्षा मन्त्रालयले शनिबार दुई पटक गरी ३९ विमान ताइवानको हवाई रक्षा क्षेत्रमा प्रवेश गरेको जनाएको छ। 

शुक्रबार ३८ वटा परमाणु बम वर्षक विमानहरु ताइवानको हवाई क्षेत्रमा प्रवेश गरेका थिए। चीनले ताइवानलाई आफ्नो मुलुकको हिस्सा मानेको छ भने ताइवान आफूलाई स्वतन्त्र मुलुक दाबी गर्दै आएको छ। 

ताइवानमा पछिल्लो एक वर्षयता लगातार चिनियाँ विमानहरु घुसपैठ भइरहेका छन्। ताइवानको रक्षा मन्त्रालयका अनुसार शनिबार दिउँसो २० वटा र राति १९ वटा सैन्य विमानहर प्रवेश गरेको जनाएको छ। 

चीनले भने यस विषयमा कुनै प्रतिक्रिया दिएको छैन।