अर्जेन्टिना नकआउट चरणमा प्रवेश : यसरी मार्‍यो बाजी 

काठमाडौं- अर्जेन्टिना जारी फिफा विश्वकप फुटबल प्रतियोगिताको अन्तिम १६ मा प्रवेश गरेको छ । सेन्टपिटर्सबर्गमा भएको खेलमा नाइजेरियालाई २–१ गेल अन्तरले पराजित गर्दै अर्जेन्टिना नकआउट चरणमा प्रवेश गरेको हो । 

खेल सुरु भएको १४ औं मिनेटमा लियोनल मेस्सीले शुरुवाती अग्रता दिलाएका थिए । मिडफिल्डबाट आएको पासलाई उनले गोलमा परिणत गरेका थिए ।

मेस्सीले जारी विश्वकपमा पहिलो गोल गरेका हुन भने प्रतियोगिताको एक सयौं गोल पनि मेस्सीकै नाममा रहेको छ । पहिलो हाफमा दबाबमा रहेको नाईजेरियाले दोस्रो हाफमा भने उत्कृष्ट पुनरागमन गरेको थियो ।

खेलको ४९ औं मिनेटमा जाभियर मार्सिरानोले डिबक्स भित्र फल गरेपछि नाइजेरियाले पेनाल्टी पाएको थियो । उक्त पेनाल्टीमा भिक्टर मोसेसले बराबरी गोल गरेका थिए ।

त्यसपछि नाइजेरियाले पकड कायम गरेकोको थियो । नाईजेरियालाई बराबरीलेनै अन्तिम १६ मा पुग्ने समिकरण भएपनि अर्जेन्टिनाले ८६ औं मिनेटमा गोल गरेको थियो । मार्कोस रोहोले गरेको उत्कृष्ट गोलसंगै अर्जेन्टिना अन्तिम १६ बाटै घर फर्किनबाट जोगियो ।

निकै रोचक खेलमा अर्जेन्टिनाले नाइजेरियालाई पराजित गर्दा समुह डी कै अर्को खेलमा क्रोएशियाले आइसल्याण्डलाई हराएको छ । आइसल्याण्ड पराजित भएसंगै अर्जेन्टिना ४ अंक सहित समुह उपविजेताको रुपमा प्रि–क्वाटरफाइनलमा पुगेको हो । 

क्रोएशिया भने शत प्रतिशत नतिजाकासाथ समूह विजेता बनेको छ । क्रोएसियाले समूह चरणको सबै खेलमा जित हात पारेको हो । क्रोएसियाले मंगलबार राति भएको खेलमा आइसल्यान्डलाई २–१ गोलअन्तरले पराजित गर्यो ।

अब प्रि–क्वाटरफाइनलमा समुह डी को उपविजेता बनेको अर्जेन्टिनाले समुह सीको विजेता फ्रान्ससंग असार १६ गते खेल्ने छ  । खेल नेपाली समयअनुसार बेलुका ७ः४५ मा हुनेछ ।

यस्तै समुह डी को विजेता क्रोएशिया र समुह सीको उपविजेता डेनमार्कबीच प्रतिस्पर्धा हुनेछ । असार १८ गते हुने प्रतिस्पर्धा नेपाली समयअनुसार राती ११ः४५ मा सुरु हुनेछ ।