रूपन्देहीमा दसैंको समयमा सुरक्षाका लागि ९४४ प्रहरी परिचालन गरिने

बुटवल- रुपन्देही प्रहरीले दसैं, तिहार र छठ पर्वलाई लक्षित गरी विशेष सुरक्षा योजना सार्वजनिक गरेको छ। पर्वका अवसरमा हुनसक्ने अपराध रोक्न र शान्ति सुरक्षा कायम गर्ने गरी विशेष सुरक्षा योजना बनाएको बताएको छ। 

शान्ति सुरक्षालगायत ट्राफिक व्यवस्थापनको लागि चाडपर्व अवधिभर ९४४ जना प्रहरी परिचालन गर्ने प्रहरी प्रवक्ता डीएसपी सत्य नारायण थापाले जानकारी दिए। 

उनले कोरोना भाइरस, चाडपर्वमा हुन सक्ने विसंगति, विकृतिविरुद्ध प्रहरी परिचालन गर्ने बताए। सीमा एरियामा कडा चेकजाँचको व्यवस्था गरि अवैध ओसार पसारलाई नियन्त्रण गर्ने समेत उनले बताए।

 प्रत्येक प्रहरी इकाइमा प्रहरी टोली राखी परिचालन गरिने, पटाका, आतीसबाजीको प्रयोगलाई नियन्त्रण गरिनेछ,’ उनले भने । 

पटाकाको प्रयोग वा यसको बिक्रीबितरण गरेको पाइए कारबाही गर्ने समेत उनले बताए। प्रवक्ता थापाले एक प्रेस विज्ञिप्ती समेत जारी गर्दै चाडपर्वमा जुवालाई नियन्त्रण गर्न प्रहरीले सादा पोशाकका प्रहरी परिचालन गर्ने योजना जनाएको छ।

 राजमार्ग लक्षित गरी रातिको समयमा गस्ती बढाउने,  पैदल, साइकल, मोटरसाइकल र गाडी गस्ती परिचालन गरिने प्रहरीले बताएको छ।

बेलहिया, भैरहवा र बुटवल बसपार्कमा यात्रु सहायता कक्ष स्थापना गरी यात्रुहरुलाई सुरक्षित यात्राको प्रत्याभूती दिलाउने डीएसपी थापाले बताए।