चीनले ताइवानमा किन पठायो बम खसाल्‍ने क्षमताका ३८ विमान?

बेइजिङ- चीन-ताइवानबीचको द्वन्द्व पछिल्लो समय बढ्दै गएको छ। ताइवानले ३८ वटा चिनियाँ जहाज आफ्नो हवाई प्रतिरक्षा क्षेत्रमा प्रवेश गरेको बताएको छ। शुक्रबार भएको यो घटना बेइजिङको अहिलेसम्मकै ठूलो घुसपैठ भनिएको छ।

ताइवानको रक्षा मन्त्रालयले परमाणु बम खसाल्ने क्षमता सहितका विमानहरू "एअर डिफेन्स आइडेन्टीफिकेसन जोन" भनिने आफ्नो हवाई प्रतिरक्षा पहिचान क्षेत्र भित्र दुई चरणमा प्रवेश गरेको जनाएको छ।

लगत्तै ताइवानले आफ्ना लडाकू विमानहरूको परिचालन गर्नुका साथै क्षेप्यास्त्र प्रणाली तैनाथ गरेर प्रतिक्रिया जनाएको छ। चीनले प्रजातान्त्रिक अभ्यास गरिरहेको ताइवानलाई आफ्नो प्रान्तको रूपमा हेर्ने गरेको छ भने ताइवानले आफूलाई छुट्टै सार्वभौम देश ठान्छ।

ताइवानले विगत एक वर्ष यता चिनियाँ वायु सेनाले आफ्नो टापु नजिकै यस्ता मिसनहरू सञ्चालन गरिरहेको बताउँदै आएको छ।

ताइवानका प्रधानमन्त्री सु जिन चाङले शनिबार पत्रकारसँगको कुराकानीमा भने, 'चीन क्षेत्रीय शान्ति बिथोल्न नियोजित रूपमा सैन्य आक्रमणमा संलग्‍न छ।' 

बेइजिङस्थित चीन सरकारले कुनै प्रतिक्रिया नदिएको भए पनि चिनियाँ सरकारी सञ्‍चारमाध्यम ग्लोबल टाइम्सले भने राष्ट्रिय दिवसको अवसरमा ताइवान नजिकैको टापुमाथि ३८ वटा सैन्य विमान उडाएको र 'रेकर्ड-ब्रेकिङ ड्रिल' गरेको जनाएको छ। 

ग्लोबल टाइम्सले यो नियमित भए पनि महत्वपूर्ण भएको जनाएको छ। ग्लोबल टाइम्सका अनुसार २५ वटा १८ जे-१६ पीएलए विमान, चारवटा सु-३० लडाकू जेट, दुईवटा एच-६ बमवर्षक विमान र एक वाई-८ एन्टि सबमेरिन युद्धक विमान रहेको जनाएको छ। 

यसअघि उसले यस्ता उडानहरू आफ्नो सार्वभौमसत्ता रक्षा तथा ताइवान र अमेरिकाबीचको साँठगाँठ विरुद्ध लक्षित रहेको बताएको थियो। गत महिना मात्रै चीनले १९ वटा र जुन महिनामा १८ वटा विमानहरू ताइवानको प्रतिरक्षा प्रणाली क्षेत्रमा पठाएको थियो।