बैंक बेइजिङको, साधारणसभा मुम्बईमा

मुम्बई-चीनको राजधानी शहर बेइजिङमा मुख्यालय रहेको एसियाली पूर्वाधार विकास बैंक (एआईआईबी)को तेस्रो साधारण सभा भारतको आर्थिक राजधानी मुम्बईमा शुरु भएको छ । 

भारतीय प्रधानमन्त्री नरेन्द्र मोदीले मंगलबार उक्त साधारण सभा उद्घाटन गरे। साधारण सभालाई सम्बोधन गर्दै मोदीले भारत विदेशी लगानीकर्ताका लागि कम जोखिमवाला राजनीतिक अर्थव्यवस्था रहेको दाबी गरे । 

चिनियाँ राष्ट्रपति सी जिनपिङको महत्वाकांक्षी परियोजना 'बेल्ट एन्ड रोड इनिसिएटिभ' (बीआरआई)मा आबद्ध हुन अस्वीकार गर्दै आएको भारत एआईआईबीको भने संस्थापक सदस्य हो । भारत त्यसको दोस्रो ठूलो सेयर होल्डर हो ।

हालसम्म ८६ वटा मुलुक उक्त बैंकको सदस्य बनिसकेका छन् । जापान, मेक्सिको, नाइजेरिया र अमेरिकाजस्ता आ-आफ्ना महादेशका ठूला अर्थतन्त्र भने सदस्य छैनन् । अमेरिकाको छत्रछायाँमा विश्व रंगमञ्चमा देखिने क्यानाडा, जर्मनी, बेलायत, अस्ट्रेलिया र दक्षिण कोरियाजस्ता राष्ट्र भने एआईआईबीका सदस्य छन् । 

२५ डिसेम्बर २०१५ देखि सञ्चालनमा आएको हो, उक्त बैंक । पश्चिमा मुलुकको हालीमुहाली रहेका एसियाली विकास बैंक र विश्व बैंकलाई चुनौती हुने गरी चीनको नेतृत्वमा एआईआईबी स्थापना भएको हो ।