जनकपुरधाम- प्रदेश २ सरकारको विभिन्न योजनामा व्यापक अनियमितता भइरहेको समाचारहरु बाहिरिरहेको समयमा अख्तियार दुरुपयोग अनुसन्धान आयोगको टोलीले मुख्यमन्त्री कार्यालयमा छापा मारेको छ।
अख्यितार दुरुपयोग अनुसन्धान आयोगबाट खटेको टोली बुधबार दिउँसो छापा मारेको हो। प्रदेश सरकारले साइकल खरिदमा व्यापक अनियमितता गरेको उजुरीका आधारमा अख्तियारले मुख्यमन्त्री कार्यालयमा छापामारेको जनाइएको हो।
उजुरीको सम्बन्धमा स्थलगत रुपमा छानबिनका लागि अख्तियारको टोली मन्त्रिपरिषद्को कार्यालयमा पुगेको अख्तियार दुरुपयोग अनुसन्धान आयोगका प्रवक्ता नारायण प्रसाद रिसालले जानकारी दिए।
साइकल खरिदमा प्रदेश सरकारले व्यापक अनियमितता गरिरहेको समाचारहरु पटक-पटक प्रकाशन-प्रसारण भएका थिए। बेटी पढाउ बेची बचाउ अभियान अन्तर्गत सामुदायिक विद्यालयहरुमा अध्ययनरत छात्राहरुलाई प्रदेश सरकारले साइकल वितरण गर्दै आइरहेको छ।
यो अभियान मुख्यमन्त्री कार्यालयअन्तर्गत सञ्चालित रहेको छ।
नेपालको ७ वटै प्रदेशमध्ये मुख्यमन्त्री कार्यालयमा छापामारी भएको प्रदेश २ मा पहिलो पटक हो। यसअघि सामाजिक विकास मन्त्रालयमा पनि अख्तियारले छापामारेको थियो।
स्रोतका अनुसार अख्तियारको टोलीले मुख्यमन्त्री कार्यालयको 'बेटी पढाउ, बेची बचाउ' अभियानसँग सम्बन्धित फाइलहरु नियन्त्रणमा लिएको छ।