प्रदेशसभाको २० गते बस्ने बैठकमा मुख्यमन्त्री राउतले विश्वासको मत लिने

जनकपुरधाम- प्रदेश २ का मुख्यमन्त्री लालबाबु राउतले असोज २० गते विश्वासको मत लिने भएका छन्। जसपा विभाजन भएको १ महिनाभन्दा बढी समय भइसकेको अवस्थामा असोज २० गते मुख्यमन्त्री राउतले विश्वासको मत लिने तयारी गरेका हुन्। 

मुख्यमन्त्री राउतले दल विभाजन भएको महिना दिनपछि पनि विश्वासको मत नलिएको आलोचना हुन थालेपछि विश्वासको मत लिने तयारी गरेका हुन्। संविधानको धारा १८८ को उपधारा २ अनुसार दल विभाजन भएको ३० दिन भित्रै विश्वासको मत लिनुपर्ने संवैधानिक व्यवस्था छ।

प्रदेश २ सरकारमा अहिले जसपा, नेपाली कांग्रेस र माओवादी केन्द्र सामेल छ। नेकपा एकीकृत समाजवादीको सरकारलाई समर्थन छ। त्यस्तै जसपाबाटै अलग भएर बनेको लोकतान्त्रिक समाजवादी पार्टी र नेकपा एमाले विपक्षमा रहने जनाएको छ। १ सय ७ सदस्यीय प्रदेशसभामा अहिले १ सय ४ जना प्रदेशसभा सदस्य प्रतिनिधित्व गरिरहेका छन्। 

प्रदेशसभामा जसपाका ३९, नेपाली कांग्रेसका १९, लोसपा १६, नेकपा (एस)का १३, नेकपा एमाले तथा माओवादी केन्द्र ८/८ र नेपाल संघीय समाजवादी पार्टीसँग १ प्रदेशसभा सदस्य छन्। 

बुधबार बिहान बसेको मन्त्रिपरिषद् बैठकबाट असोज २० गते प्रदेशसभा बैठक आह्वान गर्ने तयारी गरिएको हो। प्रदेशसभा बैठक गत जेठ २९ गते यता बस्न सकेको छैन।