सर्वोच्चले वैदेशिक सहयोग नलिने, यातायातमा अराजकता कायमै

काठमाडौं- राजधानीबाट प्रकाशित मंगलबारका राष्ट्रिय दैनिक पत्रिकाहरुले विविध विषयलाई पहिलो प्राथमिकतामा पारेका छन् । 

कसैले विदेशी संस्थाले न्यायालयमा गर्ने सहयोग नलिने निष्कर्षमा सर्वोच्च अदालत पुगेको विषयलाई मुख्य समाचार बनाएका छन् भने कसैले सिन्डिकेट गएपनि सरकारले वैकल्पिक व्यवस्था नगर्दा यातायातमा अर्को अराजकता हावी भएको देखिएको विषयलाई प्राथमिकतामा पारेका छन् । 

आजको कान्तिपुर र अन्नपूर्ण पोस्ट्ले सर्वोच्चले वैदेशिक सहायता नलिने निर्णय गरेको विषयलाई मुख्य समाचार बनाएका छन् । कान्तिपुरले सर्वोच्चको निर्णयः यूएनडीपीको सहायता अस्वीकार शीर्षकमा खबर छापेको छ भने अन्नपूर्णले न्यायालयमा वैदेशि सहयोग नलिउँ शीर्षकमा खबर लेखेको छ । 

यस्तै आजको अन्नपूर्णमा पुरा हुने भयो पुरुषको नर्स बन्ने धोको शीर्षकमा पनि विशेष खबर प्रकाशित छ । कान्तिपुर दैनिकले भने एसईईमा लापरबाही कसको ? शीर्षकमा टिप्पणी लेखेको छ ।
  
आजको नयाँ पत्रिकाले यातायातमा सिन्डिकेट हटेपनि अराजकता नगएको विषयलाई कभर स्टोरी बनाएको छ । उसले लेखेको छ– नागरिक समाजको बलमा सिन्डिकेट खारेज गरेको सरकारले वैकल्पिक व्यवस्था नगर्दा यातायातमा भद्रगोल देखिएको छ । 

नागरिक दैनिकले भने विवादास्पद निर्णय गर्दै स्थानीय सरकार शीर्षकमा मुख्य समाचार छापेको छ भने दशैँअघि उपत्यकामा मेलम्चीको पानी आउने भनि मेलम्ची आयोजनाले जनाएको प्रतिवद्धतालाई एङ्कर न्युज बनाएको छ ।