बुटवलका मेयरलाई मुक्का प्रहार गर्ने युवक धरौटीमा रिहा

बुटवल– बुटवल उपमहानगरपालिकाका मेयर शिवराज सुवेदीलाई मुक्का प्रहार गर्ने अनेरास्ववियू रुपन्देहीका सदस्य गणेश पंगेनी धरौटीमा रिहा भएका छन्। 

यही असोज ४ गते पंगेनीले बुटवलको ज्योतिनगरमा पहिरो प्रभावित क्षेत्रको अवलोकनमा गएका मेयर सुवेदीमाथि मुक्का प्रहार गरेका थिए। भदौ १३ र १४ गतेको पहिरोले २ दर्जन घरमा क्षति पुग्दा पनि स्थानीय, प्रदेश र संघीय सरकार मूकदर्शक भएको भन्दै स्थानीयले गुनासो पोख्दै आएका थिए।

असोज ४ गतेको अविरल वर्षाले थप ९ घरमा क्षति पुगेलगत्तै अवलोकनमा गएका बेला ज्योतिनगरका स्थानीय समेत रहेका पंगेनीले मेयरमाथि आक्रमण गरेका हुन्। मुक्का प्रहार गरेपछि इलाका प्रहरी कार्यालय बुटवलले पंगेनीलाई पक्राउ गरी कारवाही थालेको थियो। यद्यपि मेयर सुवेदीले भने पंगेनीलाई कुनै कारवाही नगर्न प्रहरी प्रशासनलाई आग्रह गरेका थिए।

तर, प्रहरीले भने सार्वजनिक शान्ति विरुद्धको मुद्दा चलाएको थियो। प्रमुख जिल्ला अधिकारीले उक्त मुद्दामा ५ हजार धरौटी तिर्ने गरी रिहा गरेको इलाका प्रहरी कार्यालय बुटवलका प्रहरी नायव उपरीक्षक मदन कुँवरले बताए। 

जिल्ला प्रशासनले सोमबार रिहा गर्ने आदेश गरेको हो। सुवेदीलाई मुक्का प्रहार गर्ने पंगेनी पहिरो प्रभावित हुन्। नेकपा एमालेका कार्यकर्ता पंगेनीले मुक्का प्रहार गरेको घटनालाई एमालेले समेत आक्रोशका रुपमा लिँदै मुद्दाका रुपमा अघि नबढाउने जनाएको थियो।