आठ घण्टादेखि अवरुद्ध मुग्लिन सडक खुल्यो

चितवन- पहिरोका कारण अवरुद्ध नारायणगढ–मुग्लिन सडकखण्ड आठ घण्टापछि खुलेको छ । तीन ठाउँमा गएको पहिरोका कारण राती साढे २ बजेदेखि अवरुद्ध बनेको बनेको सडक बिहान १० बजेपछि खुलेको हो । 

जिल्ला प्रहरी कार्यालय चितवनले दिएको जानकारीअनुसार सो सडकखण्डको चारकिलो, चोरखोला र कालीखोलामा पहिरो खसेको थियो । पानी पर्न रोकिएसंगै पहिरो पन्छाउने काम भएको थियो । अहिले दुइतर्फी नै सवारीसाधन चल्न थालेका छन् ।

सडक अवरुद्ध भएपछि सडकका पाँच/छ किलोमिटरसम्म लाइन लागेका गाडीहरू आ–आफ्ना गन्तव्यतर्फ लागेका छन् । बाटो खुले पनि जाम भने पुरै नखुलेको ट्राफिक प्रहरीले जनाएको छ । 

वर्षा लागेसंगै हरेक दिनजसो यो सडकखण्ड पहिरोका कारण अवरुद्ध बन्ने गरेको छ । सरकारले उच्च जोखिममा रहेका भनिएका सडकखण्डमध्ये यो एउटा सडक खण्ड हो ।

 सडक विस्तारका क्रममा रहेकाले यो सडकखण्डको भुइँ कालोपत्रे भएको भए पनि समय समयमा खस्ने पहिरोका कारण सडक जोखिम पूर्ण रहेको छ ।